Nagyaman ni Presidente Ferdinand Bongbong Marcos Jr. (PBBM) kadagiti Filipino nga agindeg ken mangmangged iti Estados Unidos gapu iti panangbukelda iti positibo a ladawan ti Filipinas ken dagiti Filipino.
Nakipinnulapol ni PBBM kadagiti Filipino nga agindeg iti San Francisco, California bayat ti isasarungkarna iti Estados Unidos, a nagbalinen a taeng ti 4.2-milion a Filipino ken Filipino-Amerikano.
Adda ni Presidente Marcos iti San Francisco, California ita (Nobiembre 15) tapno dumar-ay iti maika-30 nga Asia-Pacific Economic Cooperation (APEC) Leaders' meeting.
Kinuna ni PBBM a maibilang a bannuar iti baro a panawen dagiti Filipino a mangmangged iti ballasiw-taaw, ket pagpannakkelna dagiti nagapuananda ken pannakabukel ti positibo a ladawan ti Filipinas iti Amerika.
Manipud Kadagiti Agdama a Kameng ti Bannawag: Dios ti Agngina!
Dinayaw ti Presidente dagiti nars, doktor, first responders, ken amin a mangmangged iti Estados Unidos a nangitandudo iti naimbag a galad kas iti kinamanangngaasi, pannakakikadkadua, ken panagtitinnulong.
Impanamnama pay ni PBBM nga ar-aramiden amin ti administrasionna tapno maital-o ti panagbiag dagiti Filipino.
Malaksid iti APEC summit, sarungkaran pay ni PBBM dagiti Filipino iti Los Angeles, California ken Honolulu, Hawaii. (Ruth Abbey Gita-Carlos/PNA//Lito Hilidon/Bannawag.)
