Adda panggep ti gobierno ti Ilocos Norte mangipasdek iti multi-commodity processing center iti ili ti Sarrat tapno makissayan ti pannakalugi dagiti mannalon no awan pagidulin dagiti maapitda a mangga, bawang, lasona, kamatis, ken balatong.
Kinompirmar ni Engineer Theresa Bacnat, nga officer-in-charge ti Provincial Agriculture Office ti pannakaaprobar ti badiet ti ahensiana a PhP81.9-milion inton umay a tawen, idinto a maipatungpal ti proyekto iti nasapa a paset ti 2024.
Kinuna ni Bacnat a mailatang ti badiet para iti nakuna a proyekto a maponduan babaen ti Philippine Rural Development Project (PRDP) ti Department of Agriculture (DA), idinto a PhP20-milion ti ibaklay ti probinsia.
Makitinnulong ti Provincial Agriculture Office kadagiti gunglo dagiti mannalon tapno maagapad ti clustered farming tapno maikkanda iti naan-anay a pinansial ken teknikal a suporta manipud iti gobierno ken iti pribado a sektor.
Manipud Kadagiti Agdama a Kameng ti Bannawag: Dios ti Agngina!
Kinuna ni Atty. Pancho Jose, a chief of staff ni Gobernador Matthew Joseph Manotoc ken agricultural project consultant ti Ilocos Norte, a madaman ti pannakisaritada maipanggep iti pannakausar ti lote ti gobierno a nagtakderan ti nagserran a Northern Foods Corporation, a manamnama a pangipatakderan iti multi-commodity processing center.
Iti sabali a bangir, narugianen ti pannakaipatakder ti cold storage facility ti kamatis nga aggatad iti PhP44.6-milion iti Sarrat, nga imatonan ti San Joaquin Multi-purpose Cooperative.
Babaen ti Enterprise Development Component (I-REAP) a paset ti PRDP ti DA, maipasdek dagitoy nga impraestruktura kas sungbat iti agkurkurang nga storage facility no panagapit.
Gapu iti kinakurang ti storage facility, kapilitan nga ilako dagiti mannallon dagiti produktoda iti nababbaba a gatad. (Leilanie Adriano/PNA//Lito Hilidon/Bannawag.)
