Salaysay ni RONEL P. PAGIBITAN
"’Dadta manen ‘tay agbubulod ‘ti Bannawag!"
Dayta a sao ti diak malipatan maipanggep iti Bannawag. Ta no masaripatpatandakon nga agturong iti balay ti kaarrubami a managbasa met iti Bannawag, ammodan ti gagarak.
Naayat nga agbasa iti Bannawag daydi tatangko a Lawag (birngasna) ngem gapu iti kinarigat ti panagbiagmi idi, saanmi a mabaelan ti mangilasin iti pirak nga igatangmi iti Bannawag isu a bumulbulodkami laengen. Nangruna ket adayo ti barangaymi a Fusina (Camalaniugan, Cagayan) iti Dugo (dakkel a barangay ti Camalaniugan a madalanan ti national highway) nga ayan ti aglaklako iti Bannawag. Ket siak ti ibabaon ni tatang idi a mapan bumulod, di kad’ siak ti maaw-awagan iti agbubulod!
Idi rimmuar ti nobela ni Apo Reynaldo A. Duque a “Centerly, Manong!”, apounayen a kinalatakna iti lugarmi ta umanay a mapagiinnistoriaan daytoy kadagiti pagraraepan.
TI BANNAWAG KEN SIAK (41): Kasla Adda Naglukat a Baro a Lubong
Idi rimmuar ti komiks a "Kudor" (ni Levi Gen. Pabalan), a nasiglat ken napigsa ti bida a lalaki, adda binuniaganda iti “Kudor” iti lugarmi.
Kasta ti kasikat ti Bannawag iti ilimi idi. Dakkel ti impluensia dagiti maipabpablaak iti biag dagiti agbasbasa.
Iti tanap ti Cagayan idi awan pay internet, Bannawag ken radio ti kangrunaan a pagliwliwaan dagiti tattao. Sikat dagiti mannurat. Isu nga inarapaapko met ti agbalin a kas kadagiti sikat a mannurat. Isu a nupay diak pay napadasan ti immatendar ti aniaman a panagadal iti panagsuratan, nagputputarak latta.
Narubroban ti essemko nga agsuratsurat idi inawisnak daydi Manong Meliton Brillantes iti pagtaenganda idiay Aparri. Adda kano taripnong dagiti mannurat. Ditoy a nakitak da Apo Editor Dionisio Bulong, Apo Larry Valoroso, Abril Varilla ken dadduma pay a mannurat.
Ditoy met nga indatagko ken ni Apo Editor Bulong ti sinuratko a daniw. “Daytoy, a!” kinunana ket napalalo a ragsakko idi, nangruna idi maipablaaken. Daydi ti umuna a daniwko iti Bannawag.
Hayskul laeng ti naturposko, ngem iti laksid ti kinanumo ti pannakaammok, pinadpadasko latta ti simmalsali kadagiti salip iti panagsurat. Ngem no dadduma, maupayak. Aglalo idi naalimadamadko a kunkuna kano ti maysa a mannurat a naynay nga aghurhurado kadagiti salip a no mabasana kanon ti umuna a parapo wenno titulo pay laeng ti naisalip a daniw wenno sarita ket madi iti “panagramanna,” ipakninan daytoy. Nupay kasta, intultuloyko latta met ti nagsursurat ken pasaray agipatulod iti pakisalipko. Addanto laeng met mapagasatan a sinuratko.
Kadagidi a panawen, adda met dagiti mannurat a papagayamko ken naam-ammok kadagiti tartaripnong. Adda pay dagiti kinasinsinnuratko idi (ta saan pay ngarud nga uso idi ti selpon ken internet). Ni kabsat a Roy V. Aragon ti maysa, nga agob-obra idi iti Valley Journal a linawas a pagiwarnak a maimalmaldit idiay Bambang, Nueva Vizcaya ken maiwarwaras iti Tanap ti Cagayan. Adda idi panid ti pagiwarnak a naisangrat iti literatura. Pinadasko met idi ti nagipatpatulod iti daniwko ket adda met sumagmamano a naipablaak. Pinadpadiguannak ni kabsat a Roy iti kopia ti pagiwarnakda. Isuna pay ti nangyasideg kaniak iti newsletter a Salinong nga iruruar daydi Atty. Nole V. Lansangan, mannurat a taga-Isabela.
Inawisnak idi ni Atty. Lansangan a sumali iti salip iti daniw ti pinundarna a Constancia V. Lansangan Literary Awards wenno COVLLA. Naalak idi ti maikadua a gunggona.
Nainspirarak ket makisalipak manen, pinadasko iti Salip ti Avant-Garde a Daniw nga Ilokano nga inisponsoran daydi Dr. Godofredo S. Reyes. Anian a yaman ken ragsakko ta nayalatko ti Maikadua a Pammadayaw a Gunggona!
Pinadiguannak met daydi Tata Arturo Buenavista, mannurat iti Bannawag idi 1950s ken nagnanaed idiay Davao City, iti libro ti dandaniwna a “69.”
“Pakalaglagipamto kaniak!" kinunana. Pakalaglagipak nga agpayso ta makabulan kalpasanna, nadamagko a nagsublin iti tapok ni Apo Buenavista.
Adda met sumagmamano a dandaniwko nga inraman daydi Apo Herminigildo Viloria, mannurat a taga-Vigan, kadagiti librona.
As-asaek latta ti adda met a talentok babaen ti panagbasbasak latta iti Bannawag. Agyamanak kadagiti editor a nangted gundaway kadagiti sinuratko a maipablaak, kada Apo Prodie Gar. Padios, Cles B. Rambaud, ken ita, ni Apo GUMIL Filipinas President Ariel S. Tabag.
Agingga nga adda mannurat nga agsurat iti Ilokano ken adda lumtuad a Bannawag, mayallatiw latta ti kinasirib ni Ilokano. Amin a mannurat, addaan naisalsalumina a talugading ken kinasirib a saan a mabulod ngem ketdi maiparangkap.
Agyamyamanak ta gapu iti panagbulbulodko idi ubingak pay iti kopia ti Bannawag, a patiek a maysa a nangparubrob iti panagessemko met nga agsurat, adda met uray sangkabassit a a maiparparangkapko itan a sinuratko babaen kadagiti panid ‘toy patgentayo a magasin. --O
Magatang ti Bannawag kadagiti kadagiti sukiyo nga aglaklako iti pagiwarnak ken magasin.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, 09171360110.
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
