Babaen ti bileg ti warrant of arrest nga inyetnag ni Judge Edilu Hayag ti Manila Regional Trial Court Branch 26, tiniliw dagiti autoridad ti maatap a nalatak nga ismagler ti sibuyas ti Batangas a ni Jayson de Roxas Taculog, segun ken ni Department of Agriculture (DA) Secretary Francisco “Kiko” Tiu Laurel Jr.
Sinalungasing ni Taculog ti Republic Act 10845, wenno ti linteg a mangidekdeklarar a panangsabotahe iti ekonomia ti large-scale agricultural smuggling.
Kinuna ni Laurel a pagdadamuan pay laeng ti pannakatiliw ni Taculog, ket babaen ti tulong ti polisia, korte ken gobierno lokal, agtultuloy ti panangparmek ti DA kadagiti ismagler ken mangsabotahe iti ekonomia.
Segun iti DA, tiniliwda ni Taculog gapu iti panangaramat daytoy iti parbo nga import permit wenno papeles. Naidarum pay ni Taculog iti panangliklik ti panangbayad iti buis, saan nga umno a panangideklarar iti maangkat a produkto ken ti deklarasion ti ganansia iti Bureau of Customs.
Manipud Kadagiti Agdama a Kameng ti Bannawag: Dios ti Agngina!
No mapaneknekan a nakabasol, mabalin a maibalud ni Taculog aginggat' tungpal-biag.
Maibatay iti Anti-Agricultural Smuggling Act, makuna a large-scale agricultural smuggling no naiserrek iti pagilian ti di nababbaba ngem PhP10-milion a balor ti bagas wenno di nababbaba ngem PhP1-milion a balor ti asukar, mais, karne ti baboy, manok, bawang, lasona, sibuyas, carrots, ikan, ken natnateng a naproseso, napreserba, wenno naata. (Jel Santos/Manila Bulletin//Lito Hilidon/Bannawag)
