Nagsarita da Presidente Ferdinand R. Marcos Jr. ken Bise-Presidente ti Estados Unidos Kamala Harris maipapan iti pannakapalagda ti panagkadua dagiti pagilianda, agraman iti clean energy, teknolohia, ken ti West Philippine Sea (WPS) itay Nobiembre 16.
Napasamak daytoy bayat ti panagtataripnong dagiti papangulo ti nadumaduma a pagilian iti Asia Pacific Economic Cooperation (APEC) iti San Francisco, California.
Pinasingkedan ni Harris a kaasmang ti Filipinas ti Estados Unidos iti panangirupir ti Filipinas iti kalintegan daytoy iti WPS, idinto nga imbatad ni Harris ti obligasion ti Estados Unidos kas mayannatup iti Article IV ti 1951 US-Philippines Mutual Defense Treaty (1951 MDT).
Maibatay iti 1951 MDT, obligasion ti Estados Unidos a saranayen ti Filipinas no adda ania man nga armado a panangraut iti puersa, barko, wenno eroplano ti Filipinas iti Pasipiko, agraman iti WPS.
TURISMO: Intayon Idiay Ayuyang Garden iti Pila, Siudad ti Laoag!
Dinakamat pay da Marcos ken Harris ti pannakapatibker ken panagsaknap ti panagtinnulongda iti ekonomia babaen ti Indo-Pacific Economic Framework (IPEF), agraman ti “123” civil nuclear cooperation agreement tapno agbalin a legal ti eksportasion ti US iti nuklear a material iti Filipinas, a mangsuportar kadagiti mangmangged ken negosiante nga Amerikano. (Raymund Antonio/Manila Bulletin//Lito Hilidon/Bannawag)
