Binilin ni Presidente Ferdinand R. Marcos Jr. amin a maseknan nga ahensia ti gobierno a mangipaay a dagus iti tulong kadagiti naapektaran ti ginggined a nangdayyeg iti nadumaduma a paset ti Mindanao itay Biernes (Nobiembre 17).
Daytoy ti immandar ni PBBM kalpasan a nadayyeg ti 6.8-magnitude a ginggined ti Davao Occidental a narikna iti nadumaduma a paset ti abagatan ti Mindanao.
Segun iti Philippine Institute of Volcanology and Seismology (Phivolcs), naggunay a tectonic plate nga adda iti kauneg a 72-kilometro ti makaigapu iti panagdayyeg ti daga, idinto nga awan ti manamnama a pangta ti tsunami.
Kinuna ni PBBM a natignayen ti National Disaster Risk Reduction and Management Council (NDRRMC), idinto a makiin-innumanen ti Civil Defense Regional Offices kadagiti gobierno lokal a mangipakaammo iti kaudian a pasamak.
Manipud Kadagiti Agdama a Kameng ti Bannawag: Dios ti Agngina!
Binaon ni Department of Social Welfare and Development Secretary Rex Gatchalian dagiti opisina daytoy iti Mindanao nga agsana a mangtulong kadagiti gobierno lokal a naapektaran ti dayyeg.
Adda ita ni PBBM iti Estados Unidos para iti Asia-Pacific Economic Cooperation (APEC) Economic Leaders' Meeting a naangay iti San Francisco, California. (Argyll Cyrus Geducos/Manila Bulletin//Lito Hilidon/Bannawag)
