Panangsapul Iti Puraw A Kabalio (12)-Bannawag

Nobela ni ARIEL SOTELO TABÁG

(Grantee, 2013 National Book Development Trust Fund para iti Nobela nga Ilokano)

12 | AMIGO

SAAN a nalipatan ni Felipe ti kuna ni Tata Nardo a nabuntog a mangrugi iti lumba dagiti kabalio nga Arabian a kas ken ni Amigo. Isu a sinanayna a di pay naisenias ti panangrugi ti lumba, parpariknaannan ni Amigo kadagiti pikpik babaen dagiti tumengna ken nakakapsut a gutad ti tali daytoy.

Pudno a kadagiti damo a paset ti lumba, umuna latta dagiti kasalisal ni Amigo. Ngem apagbiit la dayta. Babaen ti awan sarday a panangpikpik ni Felipe, dagus a maabotanna dagitoy. Ket pagangayanna, kas itay kunadan, pakanenna iti tapok dagiti kalumbana.

Idi nagdinamag a naituloy manen ti lumba iti Manila, ni Amigo ti nagbalin a pagrukodan dagiti para lumba a kabalio manipud iti rantso. No kabaelan ti kabalio nga ipaayan ni Amigo iti naiget a salisal— uray maabak met laeng, mabalinen nga ibiahe daytoy idiay Manila.

Masmasdaaw met dagiti hinete nga ibabaon ti ministro tapno agsanay iti rantso no apay a saanda nga ilumba ni Amigo. Ammanto, kinunkuna met ni Felipe.

Natungpal ketdi dayta a panagem ni Felipe idi inturturedna a dinakamat ken ni Junio. A no mabalbalin, padasenna koma met nga isalip ni Amigo. Gapu iti daytoy, dinawat ni Junio ti panangbuyana iti kabaelan ni Amigo. Kalpasanna, kuna daytoy a dakamatenna iti amana ngem dina maipasigurado ta agpannuray met latta iti pangngeddeng ti ministro.

Pagimbaganna, iti sumaruno a yaay ni Junio iti rantso, maragragsakan daytoy a nangipakaammo ken ni Felipe nga immannugot ti ama daytoy. Kinapudnona, sakbay a nagbiahe daytoy, inyalaandan iti iskediul iti Makati para iti sumaruno a lawas.

Naglabbet a ragsak ken gagar ti narikna ni Felipe. Inaldaw a sinanayna ni Amigo. Kinapatpatangna daytoy a kunam la no makaawat. Pinalpalagipan met isuna ni Tata Nardo maipapan iti rebbeng a puestona no kasta nga ageskapi ni Amigo—nga ipugiitna ket no mabalbalin, bagkatenna ti bukodna a kinadagsen ken kumpasanna ti lag-oy ni Amigo tapno nasaysayud ken naparpartak met laeng ti panagtaray ti kabalio. Kuna pay daytoy a kannawidan kadagiti Arabian a kas ken ni Amigo, nasaysayaat no mapalukayan daytoy ket saan koma a maig-igetan tapno saan a makarikna iti panagkarangkang a pakapukawan met ti konsentrasionna.

Maysa aldaw sakbay ti lumba, nagbiahen da Felipe ken Amigo. Pagimbaganna, simmurot kenkuana ni Tata Nardo ket naalay-ayan bassit ti panagnerbios ni Felipe. Nagluganda iti trak a para sukon kadagiti para lumba a kabalio—trak a kas iti naglugananda ken Amigo idi pimmanawda iti lugarda.

Kas impatuldo ni Tata Nardo, adda laeng iti asideg ti Philippine Racing Club iti Makati ti compound a nagtarusanda. Adda kuadra para kadagiti para lumba a kabalio ken adda met quarters dagiti hinete. Adda met kasera dagiti para uggor iti kabalio. Kayatna a sawen, sa laeng mapan dagiti hinete no asidegen a mailumba ti saksakayan daytoy a kabalio.

Kaaduan kadagiti hinete a nadanonda ti nakapkapanen iti rantso isu a naipaspasig ni Felipe ti riknana kadakuada. Malaksid kadagiti dua a nakasair kenkuana.

Idi agrubrubuaten iti aldaw ti lumba, adda nangyangaw ken ni Felipe a rebbengna a para kalesa laeng koma ti kabaliona. Pandek ken nasabang ti bagina. Kas kenkuana nga ad-adda kano koma a para arado ngem ti agpaay a hinete. Gistayan rinapok ni Felipe daytoy. Naimbag ta ad-adu dagiti pimmatnga a pakairamanan ni Tata Nardo. Nupay nadlaw ni Felipe nga addada sumagdudua a kimmanunong iti naparato a hinete.

Naammuan ni Felipe a malaksid ken ni Amigo, adda pay dua a kabalio ti ministro a maisalip. Ti imasna, dagiti nangsutil kenkuana ti hinete dagiti dua pay a kabalio. Kuna la ngarud ni Tata Nardo a ti panangpikarda kenkuana, panangpadasda a mangikkat iti konsentrasionna. Dakkel kano a banag iti panangabak ti maysa a para lumba a kabalio ti mismo a mangsakay kenkuana ta no lugan koma ti kabalio, ti hinete ti drayber ket no kasano ti panagdepende ti taray ti lugan iti panagkambio kada panangsiliniador ti drayber, kasta met ti situasion ti kabalio ken ti hinete.

Sakbay a nagturong iti paglulumbaan, impalagip ni Tata Nardo a ginasut a ribu a pisos ti ipuspusta ti ministro iti kada kabalio daytoy. Malaksid nga adda premio iti umuna, maikadua ken maikatlo. Kuna daytoy a mamindua iti makabulan nga adda lumba a buyaen ken pagpipinnustaan dagiti kangangatuan ken kababaknangan a tattao iti pagilian.

Ninamnama met ketdin ni Felipe nga adu ti agbuya. Ngem idi maluktan ti kuadra ti paglulumbaan ket mapandan agplastar, nakigtot ta mapan met a rinibu ti kaadu dagitoy. Nakigtot la ketdi met ni Amigo iti panagiiriag dagiti tattao ta nakakarkaranting met a di masnop ti turongenna.

Nalawa ti race oval. Segun ken ni Tata Nardo, agatiddog daytoy iti maysa a kilometro ket mamindua a likusenda.

Inirtengan ni Felipe ti tali tapno agtalna ti kabaliona. Kasta met ti inaramid ni Tata Nardo a nanguggor kadakuada a nangiturong iti pagplastaranda.

Intudo ni Tata Nardo ti mabalin nga ayan ti ministro—kunana nga adda iti maysa a pribado a kuarto a desarming ti tawana ken addaan iti largabista tapno nalawag a mabuyana ti lumba.

Nagplastar da Felipe ken Amigo iti ayan ti numero 8 idinto a nagplastar dagiti nangsutil kenkuana a hinete a naammuanna idi agangay a da Tom Gutierrez ken Jerry Carena iti numero 2 ken numero 3, kas panagsaganadda.

Inyasideg ni Felipe ti ngiwatna iti lapayag ni Amigo ket kinunana, “Lalaingem, Amigo!”

Nagbanerber a nagwang-it ni Amigo.

Kas impakdaar ni Tata Nardo, kalpasan ti tallo a batingting, naluktan dagiti race rack. Dagus a pimmarakupok dagiti kasalisal ni Amigo. Nagariangga dagiti hinete iti panagyagyagda. Nagpayukpok ti tapok. Naudi da Felipe ken Amigo.

Ginutad saggabassit ni Felipe ti tali ni Amigo. Pinagsasarunona nga impikpik dagiti tumengna iti bukot ti kabaliona. Immarangkada ni Amigo. Sakbay nga agleppas ti umuna a rikus, inunaanda ti maikasiam, sa ti maikawalo a nailasinna a ni Jerry Carena.

Ginutadna pay iti apagapaman ti tali ni Amigo ket pinarpartakan pay daytoy ti nageskapi. Nalabsanda ti maikapito, sa ti maikanem sa ti maikalima. Asidegdan iti ngudo ti lumba. Ginutadna pay ti tali ket inunaanda ti maikapat sa ti maikatlo. Ginutadna pay ti tali. Asidegdan. Yinagyaganna ni Amigo. Ngem nalpasen ti lumba. Maikatloda ken Amigo.

Permi a ragsak ni Tata Nardo. Damona kano pay laeng ti makisalip ngem maikatlo a dagusen.

Napilpilit ti isem ni Felipe. Mariknana, kabaelanda koma ti mangabak.

Dayta ti imbagana iti ministro a nangdanon kadakuada iti quarters. Nagtungtung-ed laeng daytoy. Sa kinablaawan daytoy ni Tom Gutierrez nga inal-alamano met dagiti padada a hinete. Babaen dagiti patpatang dagitoy, naammuanna a masansan a mangabak daytoy. Kinapudnona, kadagiti tallo a kabalio ti ministro a masansan a mangabak, daytoy a Tom ti mangsaksakay.

Dimmagsen ti barukong ni Felipe. Kasla napat-ilan ti piditpiditna. Insapatana a dumtengto ti aldaw nga unaanna daytoy.

Iti sumaruno a pannakilumbada ken Amigo, nagun-odda ti maikadua. Apagapaman a nakarikna iti pannakkel ni Felipe. In-inut, maabotda met laeng ken Amigo ti kalikagumda nga agbalin a kasiglatan iti lumba.

Ti adatna, kalpasan ti lima pay a lumba, naipungetdan iti maikadua. Tallo a daras kadagitoy ti nangabakan ni Tom. Ad-adda la ket ngarud a rimmaba ti suron ni Felipe. Malagipna la ket ngarud a daytoy a Tom ti kadua ni Jerry Carena a nangsutil kenkuana idi damoda ken Amigo ti makilumba.

Ad-adda pay a napikar ni Felipe idi insingasing ti taga-Quezon a kaduana iti rantso a padasenda koma a pasakayan ni Amigo iti sabali a hinete. Napia kano ta adda pormal a panagsanay dagitoy iti panagsakay iti kabalio. Imbikag ni Felipe nga inkakaubinganna ti nangsaksakay iti kabaliona. No saan a dagus a pimmatnga ni Tata Nardo, nasippapo koma ni Felipe ti loko a taga-Quezon.

Ti adatna, uray gayam ti ministro, saan met a naragsak iti nagun-odda ken Amigo. Naamiris ni Felipe a kasta ta iti maysa nga agtapos ti lawas, nakisarita daytoy. Kaduana pay ni Junio a nakisarita ken ni Felipe.

Ket dinawat daytoy ti kas iti singasing ti taga-Quezon a pasakayanda iti sabali ni Amigo. Barbareng kano no mapadasan met ti kabaliona ti makagun-od iti umuna a gunggona. Ti adatna, ni Tom ti mangsakay iti kabaliona.

Karkardayo ketdi ti narikna ni Felipe. Saanna a maawatan ta imbes nga agkubuar ti barukongna iti suron, kasla ketdin naamloyan ket nagkakamakam ti tung-edna iti dawat ti ministro.

Dina ketdi napilit ti bagina a sumurot kada Tata Nardo idi ibiaheda manen ni Amigo. Sumkad ti riknana a makakita a sakayan ni Tom ti kabaliona. Panagriknana, kasla nobiana ti sakayan ni Tom. Naiget ti bilinna ken ni Tata Nardo a kitaenna koma a nalaing ni Amigo. A di koma baybay-an daytoy a mabisinan. Wenno madungiaran.

Daksanggasat ta iti kabigatanna, kunam la no nagpasina ni Felipe iti maysa a patpatgen iti biag. Saan a makatakder ni Amigo nga insangpet dagiti trakan.

NATUKKOL ti kanawan a kamauna ni Amigo. Natukkol ti maysa a paragpag daytoy iti kanawan. Nadungiaran ti subsobna.

Nagpakpakawan ni Tata Nardo ken ni Felipe iti nakapay-an ti kabaliona. Kuna daytoy a sakbay ti lumba, sinanay a sinakayan ni Tom. Napnekda met iti impakita daytoy a kinapartak. Ti adatna, iti mismo a lumba, manguddakudday metten. No saan kano a taltag ti tarayna a naparpartak laeng ngem pagna, daytay laeng paso a kunam la no agbibiahe iti kalesa. Gapu iti daytoy, yinagyagan a yinagyagan ni Tom. Nageskapi met nga uray la ni Amigo ket nalabsanna pay ti dadduma a kalumbada. Sa nagsardeng manen. Ket naramanan ni Tom ti kababaan a ranggona iti unos ti pannakilumba daytoy: maikapito.

Gapu iti daytoy, kalpasan ti lumba, binilin ti ministro nga ipasanay a nalaing ni Amigo ta nakitada met ti potensialna. Dita a napasamak ti aksidente. Nagtrampoling ti kabaliona.

“Ania met ti dunor ni Tom?” sinaludsod ni Felipe kadagiti nangitulod ken ni Amigo. Ngumarngaretnget. Ngem dina impadlaw ti pungtotna. Nangruna ket makasangsangit pay ni Tata Nardo iti panagdawatna iti dispensar.

Naklaat ni Felipe idi insungbat dagitoy a nakakaskasdaaw ta garumiad kano laeng iti tumeng ken sangkabassit a kammuol iti ulona ti naganab ni Tom.

Inagasan ni Felipe ni Amigo. Kada agpinnerengda, kasla marumrumek ti kaungganna. Kunam met la ngamin a makasao dagiti mata ni Amigo. Kasla pabpabasolenna ni Felipe ta impabus-oy daytoy iti sabali.

Dita a nakarikna ni Felipe iti nakaro a panangpabasol iti bagina. Awan serserbina nga amo ni Amigo. Awan lategna a simkad iti pagayatan ti ministro—no apay met ngamin.

Bayat ti panagpalpalaing ni Amigo, kadagiti kasual a panagpapatangda kada Tata Nardo ken dagiti maisarsar-ong a hinete, sinukisok ni Felipe no sadino ti pagaw-awidan ni Tom. Kunada nga adda balay daytoy iti Kamuning iti Quezon City—asideg laeng iti terminal dagiti bus a mapan Batangas ken Laguna.

Inwayatna ketdi daytoy nga awan a pulos ti pamalpalatpatan dagiti pagdamdamaganna iti nakaro a gurana ken ni Tom.

Iti naminsan a panagpapasiarda iti maysa a malem ti Biernes, impakadana ken ni Tata Nardo a mangyala nga agpatpatnag idiay ili ti Calatagan. Pinalubosan ti katalek.

Ngem nagtarus iti bus a mapan iti Cubao, Quezon City. Nangrabii iti maysa a karinderia nga asideg iti pagkaskaseraan ni Tom a naammuanna sakbayna a taga-Bukidnon daytoy manipud kadagiti pamilia dagiti hinete ken equestrian. Agmaymaysa iti pagdagdagusan daytoy a kasera.

Nupay alas dies ti curfew, awanen ti matatao kadagiti kalsada iti alas nuebe media. Idi rugian ni Felipe ti umasideg iti kasera a nakaan-annad, dita a naamirisna a pagimbaganna met gayam ti naadalna iti tiltiliwenna a pusa. Nagpartak nga inulina ti labes ti pagattao a pader. Awan ti nakadkadlaw kenkuana idi kinamangna ti maikadua a ridaw. Nagtoktok.

Apaglukat ni Tom ti ridaw, pinaarukonganna a dagus. Nagangek daytoy. Naawanan iti puot. Binagkatna ket sinapulna ti katre daytoy. Impaiddana. Kalpasanna, pinitikna ti kanigid a barukong daytoy. Maysa a napaut nga angek ti binulosan ti awanan-puot a Tom. Sa nagsalungayngay. Inyurnos ni Felipe a kunam la no matmaturog. Imbalunetna ti ridaw. Sa kalpasanna, kasla pusa a nangkalabkab manen ti pagattao a pader.

Napan iti terminal ket kasla pusa man met laengen a simrek iti maysa kadagiti bus ket ditan a naturog—apagisu iti umuna a biahe iti kabigatanna.

IDI dumanon iti rantso ti damag a natay iti batibat ni Tom, awan ti nakisarsarita ken ni Felipe maipapan iti daytoy. Saan ketdi a nasaknaran.

Kanaig ketdi ti damag a permi ti pungpungtot ti ministro iti napasamak. Agasem met ngamin a pukawna ti premio iti lumba ken ti ab-abakenna iti pustaan?

Ngem tunggal sumagid iti panunot ni Felipe ti maipapan iti lumba, agsidsidduker ket makulding ti asina ken ni Amigo. Ta nupay naisublina ti natukkol a paragpag ken saka ti kabaliona kalpasan ti sumagmamano a bulan, agsarimadengen ti kabaliona no gutadenna ti tali kas senial ti panageskapina koma. Nagbang-es pay ketdin iti naminsan a yinagyaganna ket kayatna a tinnagen ni Felipe. Gistayan kinabil ni Felipe.

Bumanang-es ti kabaliona no kasta a kasarsaritana. Wenno uray no sakayanna laeng nga agronda iti rantso.

Nagangayanna, nauma ni Felipe. Intalekna ni Amigo ken ni Tata Nardo. Indiayana a no kayatda, pagbalinenda a para manada kadagiti kabayan a para anak kadagiti patanorenda a para lumba. Wenno uray kadagiti para lako a pagkalesa.

Nadagsen ti barukong ni Felipe a kasta ti nagsinaanda ken ti kabaliona. Ngem nasaysayaat daytan para kenkuana ngem iti naynay a bangbang-esan ti maysa nga ayup amangan ketdi no mapapatayna pay.

NAILIWLIWAG ni Felipe ti panagsinada ken Amigo iti naynay nga ibibisita ken panangitugtugot ni Junio kenkuana.

Nadamagna iti naminsan no apay a di nagpakpakita kadagiti tiempo a nakilumlumba isuna idinto a kadua pay ti ministro idi dinawatda kenkuana nga ipasakayna iti sabali ti kabaliona. Kuna ti barito a pagelan ti amana a makiraman kadagiti aktibidad mainaig iti pinnustaan gapu ta menor de edad pay laeng daytoy. Sangkabilin kano daytoy nga insiarenna ti panagadalna.

Dagiti kakastoy a panagsarsaritada, mapasamak laeng no kasta nga agsanayda iti pinnaltogan wenno tinnakiagan. Ta no kasta a kakaduada dagiti badigard daytoy a kameng ti Metrocom, ad-adda a dagitoy ti kasarsarita ni Junio.

Adda met dagiti mabilbilang a panangitugotna ken Felipe kadagiti bar iti Makati. Pastrekenda latta met ni Junio uray no menor de edad daytoy ta ammoda a ti ministro ti amana.

Dita a naimatangan ni Felipe ti kaadu dagiti babbai nga umas-assibay ken ni Junio—kolehiala a pasosial, mabaybayadan a pasosial, ken dagiti damo laeng a makita daytoy. Bagi laeng ni Felipe ti umap-apal. Wenno bagida ken dagiti kameng ti Metrocom a badigard ti umap-apal. Nangruna ta no kasta nga adda iti VIP room, dita latta metten a rabawan ni Junio dagiti babbai a saan a mabalin nga awan ti maysa a badigard a mangkitkita kenkuana a no saan a kameng ti Metrocom, ni Felipe. Sumagmamano met kadagiti kolehiala a narabawan ni Junio ti nagpaut iti panunot ni Felipe. Dina malipatan ti kinapudaw ken kinalapsat dagitoy. Lalo ket no kasta nga adda dagiti makisarsarita kenkuana, dagus nga umasideg ni Junio ket ibagana a drayber wenno badigardna laeng ni Felipe.

Nagangayanna, nagipapasan ni Felipe dagiti mabayadan a babbai iti ili ti Calatagan. Nagduduma dagitoy. Adda Tagala, Bisaya, Waray ken kaaduan ti Bikolana.

ITI naminsan, impakaammo ni Junio ken ni Felipe nga ipalaban daytoy iti agdindinamag nga addaan iti gingginammol a maysa kadagiti badigard ti lalaki a putot ti Presidente. Segun iti istoria, addaan daytoy iti babato ti alipugpog.

“Mapangasanak,” kinuna ni Junio iti Tagalog. “Sangkalastogda. Pagnakemem man.”

Nagrasuk a dagus ti dara ni Felipe. Dagus a nayat.

Iti maysa a di matatao a lugar iti Manila ti nagsarakan ti grupo ni Junio ken ti grupo ti putot ti Presidente. Nadlaw ni Felipe a kas kadagiti kaaduan a badigard ni Junio a nakauniporme iti Metrocom dagiti kaaduan a badigard ti putot ti Presidente. Adda met dagiti saan a nakauniporme ket impapan ni Felipe a kas kadagiti dadduma a badigard ni Junio a mabalin a para patupar wenno para likidar.

“Lalaingem,” kinuna ni Junio. “Lima ribu ti pustaan. Kuam ‘diay sangaribu no mangabakka.”

Napaisem ni Felipe. Kuarta manen a nakalawlawag.

Gistayan nagkatawa ni Felipe idi isarangda ti makarupakna. Pukekkek a napugot daytoy. Mapan nga apagisu laeng a lima kadapan. Gapu ta naipakauna kenkuana nga awan ti innarmasan, dagus a naggilap iti panunot ni Felipe a kugtar ken pagaw-at a danog ti pakirupakna. Sa la karitenna iti gabbo no masuotna ti pigsa daytoy.

Kas napagtutulagan, uksob da Felipe ken ti kalabanna malaksid iti siorpant. Narugos a maong ti siortpant ni Felipe.

Apagsenias ti panaggubalda, dagus a simmarakusok ni Pukekkek. Pinasabtan ni Felipe iti agassawa a pitik a danog ngem kasla awan aniamanna ken ni Pukekkek. Simmarakusok latta ni Pukekkek bayat ti panangiwasawas daytoy kadagiti gemgemna. Nagsanud ni Felipe ket nalisianna ti damo ngem nakawit ti maikadua ti pangalna. Panagriknana, naital-o iti pigsa ti danog. Naipullasit. Dina pay naigay-at ti bumangon, addan ni Pukekkek a nangrugma kenkuana. Dagus a rinakus ni Felipe ti sibet daytoy sa inlingedna ti ulona iti boksit daytoy. Nagkalkallasawan ngarud dagiti danog daytoy. Saan a nagawidan dagiti agbuybuya ti anabaabda.

Pinilit ti Pukekkek a ribkasen ti pananget-et ni Felipe iti sibet daytoy. Ngem dina intulok. Panagriknana, pudno a napigsa ti kalabanna. Pinampiang daytoy dagiti lapayag ni Felipe ket nagwengweng dagiti lapayagna. Panagriknana, nakuppiten ti ulona. Sinirutan ni Felipe ti et-etna iti sibet daytoy. Nariknana nga adda nanaltuok a tulang ni Pukekkek. Nariknana ti pettat a panaglulok daytoy. Ngem saan a nagtalek ni Felipe—amangan no taktika laeng daytoy tapno alay-ayanna ti pananget-etna. Inirutanna ketdi pay ti pananget-etna iti sibet. Adda manen nanaltuok. Nagsan-ek ni Pukekkek. Naamiris ni Felipe a nasulnoten ti anges daytoy. Agpayso. Idi inibbatanna, kunam la no lupot a nadalupo lattan ni Pukekkek. Nagiiriag dagiti kakadua ni Junio idinto a napanganga dagiti kakadua ti putot ti Presidente.

“Awan ganas!” Adda nangipukkaw. Dina ammo no asino ti akinkadua. Ngem kasla napat-ilan ti piditpiditna. Nagbannikes sa rinudekna ti awan la ngaruden angesna a ni Pukekkek.

ITI naminsan a panagsanayda a pumaltog, adda impakita ni Junio a ladawan ken ni Felipe. Pinakuyogan daytoy iti nakasobre a pinapel a kuarta. Ti makadakes, imbilin daytoy a no mabalbalin, ‘tay koma adda uray maysa a makakita ti pannakadispatsa daytoy ngem ikagumaananna nga awan makalasin kenkuana.

Iti panagtiktik ni Felipe, naammuanna a ti adda iti ladawan, kainnagaw ni Junio iti ayat ti maysa nga adda mabalbalinna a balasang. Pagimbaganna, adda barkada daytoy nga adda gargarawda. Ken naayatda iti hapi-hapi. Iti naminsan a panagsisinada nga agbabarkada, inuray ni Felipe nga agingga laengen iti dudua dagitoy sa inrantana a dinungpar ti kadua ti adda iti ladawan. Idi kimmarit dagitoy, pinarusokan ni Felipe ti dinungparna sa kalpasanna, inikkanna iti agassawa a danog sa panalteek iti teltel ti adda iti ladawan. Ammona, umanayen dagita.

Ti adatna, kalpasan ti panangidalimanekna iti adda iti ladawan, isu metten ti nanipudan ti di panangitugtugot ni Junio kenkuana. Kuna daytoy a narigaten no adda nakailasin kenkuana. Nupay impasingked ni Felipe nga awan, awan ti nabalinanna. Ta agdadata met a maysa laeng a babaonen iti rantso.

AGTALLO tawenen ni Felipe iti rantso idi ikeddeng ti ministro a pasukatan ti balay-bakasionan daytoy. Dayta kano ti impakaammona iti asawa ni Tata Nardo a regular a mangdaldalus iti balay-bakasionan.

Tinubtobda ti sementado a dos grado a balay. Sa kalpasanna, sinukatanda iti puro kayo. Nupay kompleto dagiti allawagi a nagtrabaho, naaddaan met ni Felipe iti gundaway a nakimitmitir. Naamirisna nga agkakasayaat ti kalidadna a kayo dagiti mausar, kaaduanna a sagat ken dungon. Naammuan ni Felipe ken ni Tata Nardo a naggapu pay dagiti tarikayo kadagiti probinsia. Mabalin kano a naisakripisio ti mano bagun a mausar koma iti posporo a negosio ti ministro. Nagkatawa ni Felipe. Kunana a saan a mabalin a para posporo ti kakasta katangkenna a kayo.

Idi malpas ti balay, adda inawis ti ministro nga obispo a nangwaris iti balay. Dita met a nakitana iti umuna a gundaway ti asawa ti ministro. Iti panagkita ni Felipe, kaing-ingas daytoy ni Susan Roces—napudaw, panayagen, ken nupay addan edadna, madlaw a nabun-as dagiti suso ken patongna. Nalagipna la ket ngarud dagiti gundaway idi agtutubo pay a pinampanunotna kadagiti rabii ken parbangon ni Susan Roces. Ket uray no kasano ti panangigawidna iti riknana, nagkulaiseg ti mabagbagina.

Bayat ti pannanganda iti pangngaldaw, saan a magawidan ni Felipe ti pasaray panangtaliawna iti pamilia ti ministro. Adda ti ministro a nakakallugong latta iti para iti don iti tengnga ti asawana ken ni Junio. Naipuesto ti pangatiddogen a rektanggulo a lamisaan iti sirok ti pataguab ti terasa ti kabarbaro a balay-bakasionan. Naiwaras met iti arubayan dagiti para uppat a lamisaan a nagtugawanda a trabahador iti rantso ken dagiti dadduma pay a bisita.

Iti sumaruno nga ipapan ni Felipe iti ili ti Calatagan, iti panagkita ni Felipe kadagiti mabayadan a babbai, kalanglangada ti asawa ti ministro. Nakaadu a nagalimpatok iti dayta a rabii ket nagporpordios pay ketdin ti naalana a kaasmangna.

Ti adatna, saan metten a nakitkita ni Felipe ti asawa ti ministro nga agnagan gayam iti Maria Cecilia.

Idi nadlawna a tunggal mapan agbakasion ti ministro a gagangay nga iti arinunos ti lawas, agsasabali dagiti kakadua daytoy a babbai nga agarup kaaduanna ket kataeb laeng ni Felipe no di man naub-ubbingda pay, naawatnan iti bagina a mabayag sa makitana manen ni Madam Maria Cecilia.

Gapu iti daytoy, nagur-urnong kadagiti ladawan ni Susan Roces idi kaub-ubingan daytoy ket isu ti impigpigketna kadagiti diding ti siledna.

APAGTAPOG ni Felipe iti beinte tres idi masirpatna ni Helen a maysa a Bikolana. Saan ketdi a babayadan a babai. Para lako daytoy iti maysa a panaderia. Dina ininggaan ti balasang agingga a dina napasungbat ken nagangayanna, naawis nga agkallaysadan iti sanguanan ti mayor ti ili.

Idi gistayan napatayna ti maysa a kaduana iti rantso gapu ta nasalamaanna a mangpalpaludip iti asawana bayat ti panaglaba daytoy iti bubon iti likudan ti balay a pagyanan da Tata Nardo, insingasing ti katalek a nasayaat no yawidna laengen iti Cagayan.

Isu pay laeng ti pannakaamiris ni Felipe a nabayag gayamen a saan a nagaw-awid iti lugarna; a nabayag gayamen a dina nakitkita ti inana.

Iti Kalgaw 1977, inyawid ni Felipe ti asawana iti Santa Teresita, Cagayan.

(Tuloyna)

Napalabas a paspaset: 1 | 2 | 3 | 4 | 5 | 6 | 7 | 8 | 9 | 10 | 11

Magatang ti Bannawag kadagiti sukiyo nga aglaklako iti pagiwarnak ken magasin.

Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, 09171360110.

Mabalin pay a magatang ti Bannawag iti

Shopee: http://bit.ly/Bannawag-Shopee

Lazada: http://bit.ly/Bannawag-Lazada

Para iti digital a kopia:

PressReader: http://bit.ly/3n83kNQ

Magzter: http://bit.ly/407pazG

Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph

Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,

iti Instagram: https://www.instagram.com/bannawagmagazine

iti Twitter: https://twitter.com/BannawagMagasin

Facebook Page: https://www.facebook.com/BannawagMagasin

Facebook Public Group: https://www.facebook.com/groups/bannawag.magazine