Inanamongan ti Filipinas ti maidagdagadag a pannakabaliw ti agdama a proseso ti panag-veto iti United Nations Security Council (UNSC) a manglapped iti naalibtak a panagtignay iti panawen ti krisis kas iti gubat ti Israel ken Hamas.
Imbatad ni Philippine Permanent Representative iti UN Antonio Lagdameo iti UN General Assembly (UNGA) a mannakapagrikna koma ti UNSC iti napardas a panagbaliw ti kasasaad ti seguridad ti sangalubongan.
Buklen ti UNSC iti 15 a pagilian a pagkamengan ti China, France, Russian Federation, ti United Kingdom, ken ti United States kas permanent members. Iti agdama a proseso ti veto power iti UNSC, maawan ti bileg ti ania man a desision dagiti kameng ti Konseho no sumupiat (wenno ag-veto) ti uray maysa laeng kadagiti permanent members.
Kinuna ni Lagdameo nga iti agdama a kasasaad ti veto power, masansan a lapdan daytoy ti panagtignay ti Konseho mainaig iti nagpapateg nga isyu.
TURISMO: Intayon Idiay Ayuyang Garden iti Pila, Siudad ti Laoag!
Innayon ni Lagdameo a ti panangrisut ti UNSC iti parikut ti Myanmar idi 2021; ti Russia ken Ukraine idi 2022; ken ita, ti Israel ken Hamas, ti mangiladawan iti nabingbingay a lubong ken ti agsusupadi nga interes dagiti kameng daytoy.
Kinuna ni Lagdameo a nasken a saan koma a matengngel ti veto power ti panagtignay ti UNSC iti pannakarisut dagiti bambanag a mainiaig iti gubat ken kappia.
Maibatay iti UN Charter, pagrebbengan amin a kameng a pagilian a tungpalen ti pangngeddeng ti Konseho. (Joyce Ann L. Rocamora/PNA//Lito Hilidon/Bannawag)
