ITI CABUGAO, ILOCOS SUR. Kalpasan a maisang-at dagiti mangngalap ti Namruangan, Cabugao, Ilocos Sur ti iket ti daklis ken maukkon dagiti naalada a bulong-unas wenno espada, kiluen metten dagiti mangimaton iti daklis dagiti ikan a kompraen dagiti agur-uray a komprador a mapan met mangilako iti Northern Ilocos Sur Trading Center wenno kadagiti bario iti dumaya a paset ti Cabugao ken kadagiti kabangibang nga ili. Adda met mabati a nairanta a pagbibingayan a para sida dagiti miembro ken amin a makipagguyod. No turistaka wenno dayo a nairana nga adda iti igid ti baybay no madama ti panagguyodda iti iket, mabalinmo met a padasen ti makipagguyod bayat nga al-alaandaka iti ladawan ket no adda kawadwadan ti maala, punuenda pay ‘ta dakulapmo iti ikan (wenno maymayat manen no adda naibolsam a supot) a kas tangdanmo iti "pannakipagguyodmo." Iti puonna, mailako iti PhP80 ti sangakilo dagiti babassit a bulong-unas; mapan met a PhP200-PhP230 dagiti uppat a ramayan ti kadadakkelda. (MANCIELITO S. TACADENA)

ITI GONZAGA, CAGAYAN. Akinkanawan a ladawan: Anus ti kasapulan tapno naurnos ken napintas ti pannakaidaing ti bursawit (babassit a bulong-unas). Masansan a mapagsiglot ti dua a bursawit sakbay a maibilag tapno nadardaras nga ibaliktad no agmagan dagitoy. Kasta ti ar-aramiden dagitoy a komprador iti Batangan, Gonzaga, Cagayan. (ROSELYN C. CAMPANO)

Naipablaak iti Nobiembre 16-30, 2023 a bilang ti Bannawag.