Ni Harmony Francisca Cabie-Quinto, agdama a presidente ken chief executive officer ti Philippine American Chamber of Commerce ti Southern Colorado, ti nangyalat iti umuna a gundaway iti Modern Day Bayani Award manipud iti Rocky Mountain Region ti Amerika.
Buklen ti rehion dagiti innem nga estado: Wyoming, North Dakota, South Dakota, Montana, Kansas, ken Colorado.
Agnanaed iti agdama ni Cabie-Quinto iti Colorado Springs, kaduana ti kasimpungalanna, ni Chris Quinto, beterano iti gubat iti Iraq sangapulo a tawenen ti napalabas.
Nayawat ti pammadayaw kenkuana—maysa a plake—idi Oktubre 14 iti Hyatt Regency Denver Tech Center a nakaangayan ti Gala ken Pammadayaw a kinagiddan ti maika-25 nga anibersario ti National Federation of Filipino American Associations Region 5.
Binigbig ti awarding organization ni Cabie-Quinto gapu kadagiti gapuananna a kas presidente ti Philippine American Chamber of Commerce ti Southern Colorado, kas bise presidente ti Filipino American Associations ti Southern Colorado, kas kadua a nangpundar iti Tindahan Filipino Community ti Colorado, ken kas Executive Board Member ti Coalition of Filipino American Chambers of Commerce.
Ket Itartarayanmi Dagiti Bomba
Binigbig pay ti awarding organization a dakkel ken adu ti nagutigot ni Cabie-Quinto babaen ti lideratona kadagiti kameng a mangiduron iti kabaelan ken kinataoda tapno mapasayaat ti biag dagiti kaduada iti komunidad.
Kinuna pay ti awarding organization a ni Cabie-Quinto, nagturpos iti AB-Philosophy kas iskolar ti National Press Club-McDonald ken abogasia iti Filipinas, a kas “woman with vision, integrity and honor.”
Kinuna met ti maysa kadagiti nanginominar kenkuana, ni Avelyn Garcia, executive vice president/chief operating officer ti Unleash International Corporation, a nakita ti awarding organization, a tinulongan ni Cabie-Quinto dagiti J1 a mannursuro tapno maiparangda ti kasasayaatanen kadakuada “leading to a life of success, happiness and significance.”
Palugodan ti J-1 Teacher program dagiti kualipikado a foreign national a mangisuro a full-time kadagiti primaria ken sekundaria (K-12) a pagadalan iti Amerika iti unos ti tallo a tawen.
“She never focused the limelight on herself but instead allowed others to shine and bring out the best in them,” innayon ni Garcia.
Nakita met ti awarding organization ti dinakamat ni Victoria Stone, executive director ti Educating Children of Color Inc. ti Colorado Springs: “She has helped us develop by making us make deeper connections in the community, thus creating more opportunities for Educating Children of Color and all the youth and communities that we serve.”
Ni Cabie-Quinto ti mangig-iggem iti rekord a kas kaubingan a regular member ti National Press Club ti Filipinas idi 14 ti tawenna a panagpapaaynan a kas kameng ti weekly publication nga Associated Editors ti Quezon City ken panagsursuratna iti DepthNews Asia. Nangisuro pay iti Humanities iti Letran College ken Jose Rizal University.
Idi adda pay laeng iti Filipinas, napili a presidente ti ASEAN Law Students Association, nakabase iti Jakarta, ken nagbalin a paratignay ti Association of Law Students of the Philippines.
Nagpaay pay, bayat panagbasbasana, a kas legislative assistant ni Senador Raul Roco ken bayat
panagakemna a PRO iti walo a tawen ti GUMIL Metro Manila ken kameng ti Membership Committee ti GUMIL Filipinas.
Ni Cabie-Quinto ket anak da Maria Rosa Cabie, bise presidente ti GUMIL Metro Manila, ken Honor Blanco Cabie, agsursurat iti Bannawag ken agdama nga Opinion Editor ti Manila Standard. (Cles B. Rambaud)
