Umi-isem a linagip ni Presidente Ferdinand "Bongbong" Marcos Jr. ti panangtulong dagiti Filipino iti Hawaii iti pamiliada idi nagkamangda iti Hawaii kalpasan a pimmanawda iti Filipinas idi Pebrero 1986.
Iti pannakisarita ni PBBM iti komunidad dagiti Filipino iti Hawaii Convention Center iti Honolulu itay Nobiembre 18, inyebkasna ti panagyamanna kadagiti Filipino a nangted iti kawes, nangpakan, ken nangted iti aplayanses kadakuada idi addada iti Makiki Heights.
Sakbayna, iti maysa nga interbiu iti San Francisco, kinuna ni PBBM a saanen a masapul a pakawanenna ti asino man gapu iti napasamak iti pamiliada, idinto a bigbigenna nga iruprupir laeng idi dagiti tao ti pammatida.
Kinuna ni PBBM a saanda a kasapulan ti pammakawanna ta saanna met a pinersonal ti napasamak kadakuada. (Argyll Cyrus Geducos/Manila Bulletin//Lito Hilidon/Bannawag)
