Impetteng ni Presidente Ferdinand "Bongbong" Marcos Jr. a saan nga isuko ti Filipinas ti ania man a sakupen daytoy iti West Philippine Sea (WPS), idinto a kasapulan a maparang-ay ti kabaelan ti Filipinas iti depensa.
Iti panagbitla ni PBBM iti Daniel Inouye Speaker Series iti Asia-Pacific Center for Security Studies iti Honolulu, Hawaii itay Nobiembre 20, inggunamgunamna a saan a palusposan ti Filipinas ti uray bassit a teritorio daytoy, ken dinakamatna ti UNCLOS (United Nations Convention on the Law of the Sea) ken ti bileg ti 2016 Arbitration Award.
Malaksid iti daytoy, inyunay-unay ti Presidente a kasapulan a maparang-ay ti kabaelan ti Filipinas a mangdepensa ken mangipatungpal iti linteg, saan laeng a tapno mairupir ti kalintegan daytoy, no di ket tapno agbalin a matalek a kaasmang iti seguridad iti rehion.
Kinuna ni PBBM nga apresiarenna ti panangiparangarang ti Estados Unidos iti suportana iti itaktakderan ti Filipinas a kalintegan daytoy iti WPS. (Betheena Unite/Manila Bulletin//Lito Hilidon/Bannawag)
