Impanamnama ni Department of Agriculture (DA) Secretary Francisco Tiu Laurel Jr. a saanton a maulit ti itatayok ti presio sibuyas kas napasamak idi 2022.
Iti umuna nga idadar-ayna iti panagsasarita ti Committee on Agriculture and Food nga idauluan ni Quezon 1st district Rep. Wilfrido Mark Enverga itay Nobiembre 20, nadakamat ti ingingina ti sibuyas idi 2022 nga aggatad iti PhP700 tunggal kilo a nagparikutan idi dagiti gumatgatang ta nanginngina metten ngem karne.
Kinuna ni Laurel a PhP140 laengen ti tunggal kilo ti nalabaga a sibuyas, idinto a PhP110 ti tunggal kilo ti puraw a sibuyas ita, segun iti datos a maiparparang kenkuana iti inaldaw.
Impanamnama ni Laurel a bambatayanna a nalaing ti presio ti sibuyas ket impanamnamana a saanen a maulit ti napasamak idi 2022.
Manipud Kadagiti Agdama a Kameng ti Bannawag: Dios ti Agngina!
Kinuna ni Enverga nga idi napalabas a tawen, naipanamnama iti Kamara nga makapagwaywayasen ti Filipinas iti suplay ti sibuyas, ngem dakkel ti paggidiatanna no sumangbay ti Disiembre. (Ellson Quismoro/Manila Bulletin/Lito Hilidon/Bannawag)
