Impanamnama ni Land Transportation Franchising and Regulatory Board (LTFRB) Chairman Teofilo Guadiz III itay Nobiembre 20 a saan a madusa dagiti drayber wenno opereytor a nakidanggay iti transport strike ta bigbigenna ti kalintegan dagitoy a mangipeksa iti riknada iti gobierno.
Kinuna ni Guadiz a matarusanna ti rikna dagiti agpropropesta a drayber ken opereytor, ngem sabali a saritaanen no riribukenda dagiti saan a nakidanggay iti inwayatda a welga.
Segun ken ni Guadiz, adda karbengan ti LTFRB a mangsuspende wenno mangkanselar iti prangkisa dagiti drayber wenno opereytor a mangriribuk kadagiti padada a drayber, karaman ditoy ti panangpilit kadagiti dadduma a drayber a makidanggay iti welga ken mangdangran iti lugan wenno iti drayber a di nakidanggay.
Innayon ni Guadiz a kayatna a kasarita dagiti agproprotesta tapno mailawlawagna a nalaing ti Public Utility Vehicle Modernization (PUVM).
Manipud Kadagiti Agdama a Kameng ti Bannawag: Dios ti Agngina!
Segun iti Metropolitan Manila Development Authority (MMDA), saan a naparalisado ti transportasion gapu iti transport strike, ngem nangibaon daytoy ti 100 a lugan a nangilugan iti 2,600 a nalakon a pasahero. (Aaron Recuenco/Manila Bulletin//Lito Hilidon/Bannawag)
