Kinompirmar ti Department of Foreign Affairs (DFA) ita (Nobiembre 22) nga adda 17 a Filipino a nairaman kadagiti nakautibo iti na-hijack a barko iti Red Sea itay Nobiembre 19.
Patien ni DFA Undersecretary Eduardo Jose de Vega, adda pakainaigan ti pannaka-hijack ti barko iti pannaggubat ti Israel ken Hamas.
Segun ken ni De Vega, ti grupo dagiti rebelde a Houthi ti nangaklon a nang-hijack iti barko ta ipagarupda a kukua ti maysa nga Israeli, idinto a Briton ti akinkukua iti barko.
Nupay kasta, impanamnama dagiti rebelde a saanda a dangran dagiti ganggannaet a kameng ti barko.
Manipud Kadagiti Agdama a Kameng ti Bannawag: Dios ti Agngina!
Iti maysa a video nga inruar ti Houthi, nagdisso ti helikopterda iti barko sakbay a kinautiboda daytoy.
Innayon ni De Vega nga agsasaritanto dagiti maseknan nga ahensia ti gobierno kas iti Department of Migrant Workers (DMW) ken Overseas Workers Welfare Administration (OWWA) tapno adalenda ti situasion.
Mapan a 25 ti nakautibo a ganggannaet a naggapu iti Bulgaria, Romania, Ukraine, ken Mexico. (Joseph Pedrajas/Manila Bulletin//Lito Hilidon/Bannawag)
