Saan nga anamongan ti Land Transportation Franchising and Regulatory Board (LTFRB) ti kalikagum dagiti agprotprotesta a grupo a makanselar ti konsolidasion dagiti prangkisa ti drayber ken opereytor ti tradisional a dyip, kas paset ti Public Utility Vehicle Modernization Program (PUVMP).
Ngem kinuna ti LTFRB a sidadaan daytoy a makikompromiso iti grupo a PISTON (Pagkakaisa ng mga Samahan ng Tsuper at Operators Nationwide) no maipapan iti pannakailayon ti validity ti prangkisada iti 5 a tawen.
Malaksid iti daytoy, kinuna ni LTFRB chairman Teofilo Guadiz III a sidadaan met ti ahensia a makikompromiso iti dadduma pay a kalikagum ti PISTON -- kas iti pannakaikkat ti multa dagiti saan a nagkonsolidar ken pannakaikkat ti dadduma a probision ti Omnibus Franchising Guidelines (OFG).
Kinuna ni Guadiz a mabalin a maaramid dagiti tallo a kalikagum ti PISTON, ngem saan a mabalin nga ikkaten ti ‘Consolidation Process,’ nupay mapagbalinda a simple daytoy.
Manipud Kadagiti Agdama a Kameng ti Bannawag: Dios ti Agngina!
Ti konsolidasion ti prangkisa ti kangrunaan a supsupiaten ti grupo a PISTON isu nga inwayatda ti 3 nga aldaw a transport strike, a dinanggayan metten ti grupo a Manibela.
Inton Disiembre 31 ti maudi a panangidatag iti konsolidasion.
Indagadag ni LTFRB Spokesperson Ceiline Pialago kadagiti drayber ken opereytor a mangidatagdan iti intent to consolidate, ta daytoy ti maysa kadagiti kasapulan a dokumento no agpabaro ti rehistro iti Land Transportation Office (LTO).
Namnamaen ni Guadiz a madanundan ti 85 agingga 90 a porsiento ti pannakakonsolidar dagiti prangkisa kalpasan ti Disiembre 31. (Aaron Recuenco/Manila Bulletin//Lito Hilidon/Bannawag)
