Rinugianen ti Armed Forces of the Philippines (AFP) ken ti United States Indo-Pacific Command (USINDOPACOM) itay Nobiembre 21 ti panangwanawanda iti taaw ken tangatang ti West Philippine Sea (WPS) nga agpaut agingga inton Nobiembre 23.
Paset daytoy ti Mutual Defense Board - Security Engagement Board (MDB-SEB) a sinangal ti Filipinas ken Estados Unidos (US) tapno mapatibker ti panagtinnulong dagiti armadada iti panangwanawan iti baybay ken tangatang.
Segun iti AFP, 3 a barko ti Philippine Navy, 2 nga FA-50PH, ken 1 nga A-29B 'Super Tucano' ti imbaon ti Filipinas; idinto nga imbaon ti US ti 1 a combat ship ken 1 a P8-A, ti mapan agwanawan manipud iti Batanes agingga iti WPS.
Kinuna ni AFP public affairs office chief Col. Xerxes Trinidad a naisayangkat daytoy tapno maitandudo ti maibasar-linteg nga urnos iti sangalubongan. (Ruth Abbey Gita-Carlos/PNA//Lito Hilidon/Bannawag)
