Immanamong ti gobierno ti Israel ken ti grupo a Hamas iti uppat nga aldaw a pannakaisardeng ti gubat iti Gaza itay Nobiembre 22, segun ken ni Department of Foreign Affairs (DFA) Undersecretary Eduardo de Vega.
Nasangal ti tulag iti nagbaetan ti Israel ken Hamas babaen ti panangibabaet ni Qatari Minister of State at the Foreign Ministry Mohammed Al-Khulaifi.
Kinuna ni Al-Khulaifi nga awan ti aggaraw a militar, awan ti mangraut wenno mangtiliw iti asino man iti amin a paset ti Gaza Strip.
Maibatay iti tulag, 50 nga ubbing ken babbai nga Israeli ti luk-atan ti Hamas, idinto a 150 a Palestinian, a pakairamanan dagiti ubbing ken babbai, ti ruk-atan ti Israel.
Manipud Kadagiti Agdama a Kameng ti Bannawag: Dios ti Agngina!
Gapu iti tulag, mapalubosanen ti iseserrek dagiti trak a mangituldo ti tulong kadagiti sibilian a nadangran iti amianan ken abagatan a paset ti Gaza.
Inanamaen ni De Vega a mairaman ti dua a Filipino a kinautibo ti Hamas kadagiti maispal gapu iti pannakaisardeng ti gubat. (Raymund Antonio/Manila Bulletin//Lito Hilidon/Bannawag)
