Impaulog ni Presidente Ferdinand 'Bongbong' Marcos Jr. itay Nobiembre 22 ti Executive Order (EO) 47 ken proklamasion a mangipaay iti amnestia kadagiti rebelde.
Babaen ti EO 47, maamendaran ti EO 125 nga impaulog ti naglabas nga administrasion, a nangbuangay iti National Amnesty Commission (NAC) ngem saan a nabaliwan ti trabaho daytoy.
Ti NAC ti napusgan a mangawat ken mangiproseso iti agkiddaw iti amnestia ken mangitingiting no maikari met laeng iti amnestia ti aplikante segun iti baro a proklamasion.
Babaen ti Proclamation No. 403 maikkan iti amnestia dagiti kameng ti Rebolusyonaryong Partido ng Manggagawa ng Pilipinas/Revolutionary Proletarian Army/Alex Boncayao Brigade (RPMP-RPA-ABB) a nakaaramid iti krimen a sagudayen ti Revised Penal Code ken Special Penal laws gapu iti panangitandudoda iti politikal a pammatida.
TURISMO: Intayon Idiay Ayuyang Garden iti Pila, Siudad ti Laoag!
Ti Proclamation No. 404 ti mangipaay iti amnestia kadagiti dati a kameng ti CPP-NPA-NDF a nakaaramid iti krimen a sagudayen ti Revised Penal Code ken Special Penal laws gapu iti panangitandudoda iti politikal a pammatida.
Ipaay ti Proclamation No. 405 ken 46 ti pammakawan kadagiti kameng ti MILF ken MNLF, kas iti panagsaganadda, a nakaaramid iti krimen a sagudayen ti Revised Penal Code ken Special Penal laws gapu iti panangitandudoda iti politikal a pammatida.
Mailaksid iti proklamasion dagiti krimen a masaker, panangkidnap, panangrames, terorismo, krimen a maibusor iti kinadalus ti panagbiag, krimen a naaramid gapu iti personal a panggep, panangsalungasing iti Comprehensive Dangerous Drugs Act of 2002, panaglabsing iti Geneva Convention ti 1949, ken pananglabsing iti human rights. (Argyll Cyrus Geducos/Manila Bulletin//Lito Hilidon/Bannawag)
