Mangnamnama ti Department of Transportation (DOTr) nga agbiag manen ti industria ti tren ti Filipinas babaen ti proyekto a North-South Commuter Railway (NSCR) ken South Long Haul (SLH).
Kinuna ni DOTr Secretary Jaime Bautista a dagitoy a proyekto ti mangital-o iti kasasaad ti industria ti tren, idinto mangparnuay iti panggedan ti tao, mangpadur-as iti ekonomia. ken mangep-ep iti nakaro a trapik iti Metro Manila.
Kinuna ni Bautista a mangipasdek iti baro, moderno, ken napardas a tren nga agbiahe manipud Clark (Pampanga) agingga iti Calamba ken agtarus iti Bicol.
Segun ken ni Bautista, 147 a kilometro ti maar-aramid nga NSCR a mangisilpo ti Metro Manila iti Pampanga ken Laguna, ken addaan daytoy iti 35 nga estasion a mangpataray iti 51 a commuter train set ken 7 nga express train set.
Manipud Kadagiti Agdama a Kameng ti Bannawag: Dios ti Agngina!
Manamnama a mapapardas ti biahe manipud Calamba agingga iti Clark iti 2 nga oras, idinto nga 4 nga oras ti agdama a kapaut ti biahe.
Agatiddug iti 577-kilometro ken addaan iti 33 nga estasion ti SLH a mangisilpo met iti Manila iti Batangas ken Bicol, ket manamanama nga agbalinen nga 4.5 nga oras laeng ti biahe, idinto nga agpaut ti 14 agingga 18 nga oras ti biahe iti agdama.
Kinuna ni Bautista nga adu ti nagbalin a parikut ti industria ti tren iti pagilian kadagiti naglabas, ngem awan duadua a ti NSCR ken SLH ti mangbiag iti industria ti tren ti Filipinas. (Martin Sadongdong/Manila Bulletin//Lito Hilidon/Bannawag)
