Sitatakder dagiti kameng ti Israeli Security Forces iti sibay dagiti bus nga agur-uray iti helipad ti Schneider Medical Centre itay Nobiembre 24, a panangrugi ti uppat nga aldaw a pannakaisardeng ti gubat ti Israel ken Hamas.

Rinuk-atan ti Hamas ti 24 nga Israeli a kinautiboda, kas panangtungpal iti tulagna iti Israel a nangpasardeng iti gubat iti Gaza.

Segun ken ni Qatari foreign ministry spokesperson Majed Al Ansari, 13 nga Israeli, 10 a Thai, ken maysa a Filipino ti rinuk-atan ti Hamas itay Nobiembre 24.

Pinatalgedan ita (Nobiembre 25) ni Presidente Ferdinand R. Marcos Jr. ti pannakawayawaya ni Gelienor 'Jimmy' Pacheco, 33, a nakautibo idi Oktubre 7, nga adda itan iti sidong ti embahada ti Filipinas iti Israel.

Nagyaman ni Presidente Marcos iti gobierno ti Qatar gapu iti dakkel a tulongna iti pannakawayawaya ni Pacheco, nupay maseknan ti Presidente iti kasasaad ti maysa pay a Filipino a ni Noralyn Babadilla.

Eksklusibo iti Website
Manipud Kadagiti Agdama a Kameng ti Bannawag: Dios ti Agngina!

Manipud Kadagiti Agdama a Kameng ti Bannawag: Dios ti Agngina!

Iti biang ti Israel, rinuk-atanna met ti 39 a nakautibo a Palestinian a pakairamanan dagiti ubbing ken babbai, kas panangtungpal iti tulag a nasangal babaen ti panangibabaet ti Qatar, Egypt, ken ti Estados Unidos.

Saan a nababbaba iti 50 a nakautibo nga Israeli ti manamnama a maruk-atan bayat iti uppat nga aldaw a di panagginnubat ti Israel ken Hamas, idinto a 150 a Palestinian ti manamnama a ruk-atan ti Israel. (Argyll Cyrus Geducos/Manila Bulletin//AFP//Lito Hilidon/Bannawag)