Salaysay da RENZ CHRISTOFFER BAYLON ken NEPO T. BENITEZ JR.
MANIPUD idi immatonan ni Provincial Jail Warden Raymond T. Tabios ti Ilocos Sur Provincial Jail idi tawen 2015 agingga iti agdama, immadu dagiti proyekto nga ingganuatna a para iti pagsayaatan dagiti persons deprived of liberty (PDL) iti Ilocos Sur Provincial Jail (ISPJ). Maysa ditoy ti organiko a wagas ti panagtalon.
Adda bakante a lote iti batog ti Admin Building a nakabatbato ken nakataytayag dagiti ruotna ket idi bimmisita ti Office of the Provincial Agriculturist (OPAG), napanunotda a mabalin a mulaan daytoy a daga.
Insingasing ngarud idi da Teresito Batin ken Dante Gagto manipud iti OPAG ken ni Jail Warden Tabios a padalusanna dayta a paset tapno isu ti pagmulaan dagiti PDL.
Babaen ti pammalubos ni dati a Gobernador Ryan Singson, dagus nga inallukoy ni Tabios dagiti PDL a pagtitinnulonganda a dalusan ken mulaan ti nasao a daga. Ita, dagiti mulada a nateng ti pangal-alaan dagiti PDL iti lutuenda a sidaen. No nawadwad ti apit, ilakoda kadagiti bisita ken kadagiti guardia ti ISPJ.
TURISMO: Intayon Idiay Ayuyang Garden iti Pila, Siudad ti Laoag!
Babaen daytoy organiko a pagnatengan, napadayawan ti ISPJ a kas modelo a pasilidad a para kadagiti PDL ken napaadda ti slogan-da a “From Violators to Cultivators.”
Nakipartisiparda pay iti training nga ingganuat ti TESDA ken dadduma pay nga ahensia ti gobierno. Maysa kadagiti nasursuroda ti panagaramid iti artificial bonsai beads wenno panagaramid iti artipisial a mula babaen ti panagaramat iti beads. Dagiti umay bumisita gumatangda met iti souvenir-da. Maysa daytoy ita kadagiti kangrunaan a pagsapulan dagiti PDL.
Ni Jacqueline Amano Pablico, maysa a lady guard ti ISPJ, ti trainer dagiti PDL iti panagaramid iti artipisial a bonsai beads.
Dagiti dadduma pay a proyekto dagiti PDL iti ISPJ: panagaramid iti cement bricks, hollow blocks, beads wallet, beads key chain, dishwashing liquid, rugs, panagpataud iti oyster mushroom, kdp.
Pammaneknek ti kinaproduktibo dagiti PDL iti Ilocos Sur ti pannakabaelda nga agaramid kadagiti nadumaduma a banag manipud kadagiti materiales a masarakan iti pasilidad.
Dakkel ti maitulong dagitoy a proyekto kadagiti PDL ta saanen a dagiti pamiliada iti ruar ti mangted iti kuartada. No dadduma, isuda payen ti mangted iti kuarta iti pamiliada.
Adu dagiti umay bumisbisita saan laeng a gapu iti napintas a panangiwanwan ni Jail Warden Tabios iti ISPJ no di pay ket gapu iti kinapintas ti garden ken iti kinadalus ti aglawlaw, kangrunaanna dagiti makaay-ayo nga artificial bonsai beads a partuat dagiti PDL. --O
