Gapu kadagiti aglaklako iti Bannawag, sibibiag latta ti Bannawag. Pagyamanan dagiti mangimatmaton iti Bannawag ti kaadda dagitoy a dealers a tumultulong a mangisaksaknap itoy maibilang a kangrunaan a magasin dagiti Ilokano. Kadagiti sumarsaruno pay a bilang ti magasin ken ditoy bannawag.ph, iruartayo dagiti dadduma pay a ladawan dagiti paggatangan iti Bannawag. Maawis ngarud dagiti readers a mangipatulod iti ladawanda bayat ti igagatangda iti Bannawag kadagiti sukida a paggatangan.
Iti Ilocos Norte, Ilocos Sur, ken Cagayan, adtoy ti sumagmamano kadagiti pagtagilakuan a pakagatangan iti Bannawag:
Iti Piddig, Ilocos Norte
Nawada ti isem ni Melinda Salvador (akinkanawan), agnaed ken agdama a tesorera ti Brgy. 20 Calluza, Piddig, Ilocos Norte ta adda manen aglako iti Bannawag iti ilida. Inkakaubingan ni Melinda ti agbasbasa iti Bannawag ngem naisardengna idi awanen ti aglako iti Piddig. Maragsakan met ni Nonet Mariano Ruz (kanigid), akinkukua ken mangtartarawidwid iti Shermay Pharmacy (dati a Marvel Pharmacy), ta mangrugi manen nga agsubli dagiti dati a sukina a gumatgatang iti Bannawag. Sipud idi nangrugi ti lockdown gapu iti COVID-19 idi 2020 agingga idi agtapos ti Hulio i'toy a tawen, awan aglako iti Bannawag iti Piddig. Masarakan ti Shermay Pharmacy iti sango ti Palawan Pawnshop, lauden ti Piddig Public Market.
Iti Sanchez Mira, Cagayan
Ni three-termer Provincial Board Member ti 2nd District ti Cagayan Vilmer V. Viloria ken ni Ena a kaingungotna iti igagatangda iti sumagmamano a kopia ti Bannawag iti Onin’s General Merchandise iti 2nd Floor ti Pamilihang Bayan iti Sanchez Mira. Kaduada iti ladawan ni Derick Marcel F. Yabes, akinkukua iti Onin’s.
Iti maikadua a ladawan, manipud iti Abbangkeruan, Pamplona, immay met gimmatang iti back issue ti Bannawag ni Nana Pising Jadraque, 76, tubo ti Balaoan, La Union ngem nagdappatda iti Cagayan sumagmamano a tawen kalpasan ti Maikadua a Gubat iti Sangalubongan. Daydi tatangna ti managbasa iti Bannawag ket isu metten ti kangrunaan a nagsursuruanna nga agbasa iti Bannawag sakbay a simrek iti pagadalan.
Iti Bangui, Ilocos Norte
Aw-awaten ni Abraham Aguino Jr., mannurat ti Bannawag, ti kopia ti magasin a ginatangna ken ni Mary Anne Valiente, tindera ti Nyshan's Pharmacy iti Bangui, Ilocos Norte. Adda laeng iti sango ti Bangui District Hospital ti Nyshan's Pharmacy a kukua da Ms. Nikki Ramones.
Iti Burgos, Ilocos Norte
Yaw-awat ni Ms. Catherine Sallutan, manarawidwid ti Burgos, Ilocos Norte Active and Retirees Military and Police Personnel Association Multipurpose Cooperative (BINARMAPPA-MPC) iti Burgos, Ilocos Norte ti kopia ti Bannawag ken ni Joel B. Manuel, principal ti Bangui National High School. Magatang ti Bannawag iti nasao a kooperatiba a masarakan iti sentro ti Burgos.
Iti San Vicente, Ilocos Sur
Ipakpakita ni Archie C. Anipot (akinkanigid), kameng ti Philippine National Police ken tubo ti Brgy. Capangpangan, Vigan City, Ilocos Sur dagiti kopia ti Nobiembre 1-15, 2023 a bilang ti Bannawag a ginatangna iti Pichay-Benzon Store a kukua ken imatonan ni Carusel Vaughn Pichay Jacob. Nairaman iti ladawan ni Wedna Pico Pichay a saleslady ken kapidua ni Carusel Vaughn. Masarakan ti nasao a puesto iti St. Paul Avenue, Bayubay Sur, San Vicente, Ilocos Sur, igid ti kalsada, likudan laeng ti Home Pension. Mabalin met ti agorder wenno agpareserba kadakuada iti CP No. 0916-414-5130.
Iti Bacarra, Ilocos Norte
Yaw-awat ni Mario De Vera ti kopia ti Bannawag a ginatang ni Arnel Asis, mangisursuro iti Bacarra National Comprehensive High School. Kukua nj Apo De Vera ti Mario’s Houseware Trading, maysa a pagtagilakuan a masarakan iti uneg ti tiendaan iti poblacion ti Bacarra. Isunan ti naglako iti Bannawag iti nasao nga ili kalpasan ti panagrikep gapu iti pandemia daydi grocery store a dati nga aglaklako.
Iti Siudad ti Batac
Kinaretrato ni Adoracion Tagalicud Salantes, retirado a mannursuro iti Parangopong Elementary School, ni Arsenia Esta Rupisan, akinkukua iti paglakuan iti Bannawag ken dadduma pay a magasin agraman RTWs. Masarakan ti puesto ni Ms. Rupisan iti Bgry. 2 Ablan, Siudad ti Batac ken kasinnango ti LBC Padala.
(Naipablaak iti Disiembre 16-31, 2023 a bilang ti Bannawag.)
