Inlawlawag ti Department of Justice (DOJ) ita, Nobiembre 29, nga uray maikkan ti amnestia dagiti dati a rebelde, mabalin latta a maidarumda no nakaaramidda iti makunkuna a heinous crime.
Segun iti Proclamation No. 403, 404, 405, ken 406, impaay ni Presidente Marcos ti amnestia kadagiti kameng ti Rebolusyonaryong Partido ng Manggagawa ng Pilipinas/Revolutionary Proletarian Army/Alex Boncayao Brigade (RPMP-RPA-ABB), dagiti dati a kameng ti Communist Party of the Philippines New People’s Army-National Democratic Front (CPP-NPA-NDF), ti Moro Islamic Liberation Front (MILF), ken ti Moro National Liberation Front (MNLF).
Kinuna ti DOJ a suportaran daytoy ti gandat ti Presidente a mangilungalong iti panagkakappia baben ti amnestia, ngem inyunay-unay daytoy a saan a mairaman dagiti maibilang a heinous crime kas iti panangkidnap, masaker, panangrames, terorismo, ken panangsalungasing iti kalintegan ti tao (human rights).
Innayon pay ti ahensia a sisasagana daytoy a makitinnulong iti National Amnesty Commission (NAC) iti pannakaiproseso dagiti agkiddaw ti amnestia kas sagudayen ti baro a linteg. (Jeffrey Damicog/Manila Bulletin//Lito Hilidon/Bannawag)
