Salaysay ni ROMEO L. LICUDINE
IDI addaak iti Grade 1 iti Saint Joseph School iti Becques, Tagudin, Ilocos Sur, ammokon ti agbasa iti Ilokano. Ilokano ti pagisuro daydi maestromi a Pedro Lapitan. Immuna nga insurona ti "abakada" sa dagiti patang nga Ilokano. Naanus nga agisuro, saan a nauyong. Banag a pagaayatmi nga ubbing nga adalanna. Kaniak, laklakaek a basaen dagiti isuratna nga Ilokano iti pisarra. Nakasaysayud man ti panagbasak basta Ilokano.
Daydin sa tatangko ti immalaak. Nalaing nga agsao iti Ingles. Diak ammo no ania a grado ti nalpasna. Ni tatangko idi ti pagpapaisuruan ti kasinsinko nga agbasa iti libro daytoy. Napasgedan nga arutang ti silawna no umay ditoy balaymi iti rabii. Awan pay idi ti koriente iti lugarmi (Santa Cruz, Ilocos Sur).
Idi addaakon iti Grade 2, pamrayakon ti mapan bumulod iti Bannawag iti balay da Manang Victoria Dauz ìdiay pungto ti abagatan ti purokmi a Pattiqui.
Unaekto a lukipen dagiti komiks. Pagaayatko a basaen ti kabibiag da Kenkoy ken Rosing. Kasta met ti pakasaritaan da Hagibis, Limahong, Misterioso ken dadduma pay. Isublatkonto a basaen dagiti sarita a sinurat dagiti nalaing a mannurat a kas kada Pelagio Alcantara, Roland Al Bueno, Arsenio Cortez, ken dadduma pay a diakon mainaganan. Sa dagiti napipintas a nobela dagiti nasisiglat a nobelista a da Nemesio Caravana, Constante Casabar, Atty. Arsenio Ramel Jr., kdp.
Manipud Kadagiti Agdama a Kameng ti Bannawag: Dios ti Agngina!
Ileppasko a basaen amin a linaon ti Bannawag iti kagudua ti aldaw ta kasta ti bumulbulod laeng. Tapno makabulodakto manen iti sumaruno a bilang. Kaarignan ti panakasumokko iti makaapiang a banag a sapsapulekon ti panangbasak kadagiti sarita, daniw, salaysay, nangruna ti tuloy dagiti nobela a komiks ken prosa ta siempre, kayatko a maammuan dagiti sumaruno a pasamak ti istoria.
Idi addaakon iti sekundaria iti Tagudin High School, kasla naitukit a bukel iti panunotko dagiti mabasbasak iti Bannawag. Immapalak a makaipablaak met. Nagputarak iti maysa a sarita, pinauluak iti "Singsing." Impatulodko iti Bannawag. Ngem siguro, agsipud ta diak pay idi kabesado ti istilo ti panagsurat iti sarita ken pati umno a gramatika ken ortograpia ti pagsasao nga Ilokano, insubli ti Bannawag ti sinuratko. Napaayak, ngem saan naguped ti arapaapko nga agbalin a mannurat. Lalo ketdi a rimmegtaak nga agarapaap a makaipablaak iti Bannawag.
Inkagumaak pay ti gumatang sagpaminsan iti Bannawag uray no beinte sentimos laeng ti balonko idi hayskulak. Apagisu a pletek a mapan ken agawid. No dadduma a masapa ti retira iti malem, pagnaek ti pito a kilometro a Tagudin-Pattiqui. Inan-anusak tapno makaurnongak laeng iti igatangko iti Bannawag.
Naawisak pay idi a tumabuno iti seminar iti panagsurat idiay Suso Beach, Sta. Maria. Napalalo idi nga ayatko a dumar-ay. Ngem nagsensennaayak. Awan umanay a pagpletek! Uray dumawatak koma iti inak, ta adda met ngata kuartana ket mabalin nga ikkannak met, napanunotko a makissayan ti iduldulinna a paragastosmi. Nakurapay laeng ti pamilia a nagtaudak. Pito laeng ti tawenko idi maulilakami iti ama nga agkakabsat. Siak ti inaunaan.
Gundawayko koman a makasursuro iti nasao a seminar. Ngerm diak met nakapan. Isu nga inan-anusak ti nagbulbulod iti Bannawag da Manang Victoria. Sa pasaray makagatangak iti kopia no adda maurnongko. Nagbalin a nagadalak iti panagsurat ti panagbasbasak iti Bannawag agingga a nagturposak iti sekundaria.
Gapu iti rigat, nagsardengak nga agbasa. Nagtuloyak iti bukot ti nuangko. Ďakkel ti essemko nga agadal ngem tubeng ti panagkurkurangmi iti biag. Tinulongak ti inak a nagtalon. Makitaltalonkami laeng. Naigamerak ngarud iti pitak.
Ngem saan a napunas ti essemko iti literatura. Ti Bannawag ti nangrubrob iti panagsursurok nga agsurat iti sarita ken daniw.
Idi nagkandidato daydi Dr. Godofredo S. Reyes iti kinadiputado iti segunda distrito ti llocos Sur, naengganioak kadagiti dandaniwna a nai-record iti tape a naipangpangngeg bayat ti panagkampaniana. Inarapaapko ti makaputar met iti kas kadagiti daniwna.
Iti panaglabas dagiti tawen, saan a napukaw ti essemko a mailanad met ti naganko iti panid ti Bannawag. Diak sinardengan ti nagsursurat. No dadduma, gamdek met ti sumali kadagiti salip iti panagsurat. Pinadasko ti makisinnangdo kadagiti bangolan. Awan gasatko iti salip. Ngem ad-adda laeng a rimmeggetak nga agsurat, saanak a nagpaabak iti pannakaupayko.
Nagipatpatulodak met latta iti Bannawag. Iti panagudongko iti maysa a bigat, nagturongak iti paggatgatangak iti Bannawag. Kasla diak patien ngem naisulek iti matak ti naipaskil iti akkub ti Bannawag, Mayo 31, 2010 a bilang:
Sarita Itoy a Lawas
TI INA
Nagkebbaak, daytay sa met saritakon dayta? Sigagagarak a nanglukip iti magasin ket addaytan a naitangkarang, iti panid 2:
Ti Ina
Sarita ni ROMEO L. LICUDINE
Ha? Ti sinuratko, rimmuar! Diak masbaalan ti rag-ok. Ginatangko a dagus ti Bannawag. Pagyamanak unay dagiti mangimatmaton iti Bannawag, kada Editor Cles Rambaud ken Literary Editor Juan Al. Asuncion, iti anusda a nangkayas iti saritak. Iti kamaudiananna, makunak a natungpalko met laengen ti arapaapko a makaipablaak--ti makitak ti naganko a nailanad iti Bannawag!
Agingga a naipablaak ti umuna a daniwko a napauluan iti "Padeppa" (Septiembre 1-15, 2020 a bilang). Utangko ken ni Poetry Editor Ariel Tabag ti anusna a nangtaming iti daniwko. Manen, diak mainaganan ti napalaus a ragsakko. Nangruna idi agsasaruno metten dagiti maipablaakko a sinurat iti panaglabas dagiti tawen, agingga iti agdama.
Pagyamanak unay ti kunaek a panangibagnos ti Bannawag iti dalanko nga agturong iti pannakatungpal ti arapaapko ken iti nanumo met a pannakigamulok iti Literatura nga Ilokano. --O
Magatang ti Bannawag kadagiti sukiyo nga aglaklako iti pagiwarnak ken magasin.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, 09171360110.
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
