Salaysay ni ALFREDO E. VERZOSA
NOBIEMBRE 22, 2023, agarup alas otso iti dayta a bigat idi maaramid ti wreath-laying ceremony iti sakaanan ti monumento ni Heneral Antonio Luna iti tengnga ti plasa ti Tayum, Abra, nga inatendaran dagiti empleado ti munisipio ti Tayum, ken dagiti opisial ti gobierno lokal nga indauluan ni Mayor Placido ‘Glen’ Eduarte Jr. Nangrugi ti programa babaen ti pannakatokar ti National Anthem a sinaruno ti Tayum Municipal Hymn. Ni met Rev. Fr. Samuel Baruela ti nangidaulo iti kararag a maitutop iti dayta nga okasion ken ti panangilawlawagna kadagiti responsibilidad ti tunggal umili.
Sinarita ni Mayor Eduarte Jr. ti kinaasino ti heneral, no ania dagiti nagapuananna iti pagilian, dagiti naisangsangayan a pagsiglatanna ken lineppasna nga adal sadiay Europa, ti kinadoktoradona iti parmasia, ikakappengna iti tignay propaganda sadiay España ken ti panagsursuratna iti pagiwarnak a La Solidaridad babaen ti aliasna a Taga-Ilog. Nga iti met isusublina iti Filipinas idi 1898, impasdekna ti pagiwarnak a La Independencia a nangdildillaw iti panangsakup dagiti Amerikano iti pagilian. Nagpaay pay a kas delegado ti Kongreso ti Malolos ken katulongan a Sekretario ti Gubat. Impasdekna ti Akademia Militar ket nadutokan a kas pangulo a komandante ti buyot militar ti Republika ti Filipinas, ken ti pannakalib-atna, ken nakatayanna, iti Cabanatuan idi Hunio 5, 1899 iti tawenna a 33.
Addaan iti 21-gun salute ti seremonia a kas panangbigbig iti kinabannuar ni Heneral Antonio Luna. Indauluan met ni Acting Chief PCpt. Nelvin Garduque ti puersa ti PNP Tayum a nagmartsa ken nangsaludo iti bannuar. Ni Marivic Procesa Tangco ti nagpaay nga emcee ti nasao nga okasion. Paset daytoy a programa ti makalawas a panangselebrar ti ili a Tayum iti panagpiestana manipud iti Nobiembre 18 agingga iti 25 a kaaldawan ni Apo Santa Catalina iti tema: “Pabuya ken Parambak, Pagyaman ti Patronak, Indigo Fest 2023.”
Ti indigo ket isu daytay maris a maala manipud iti mula a maaw-awagan iti tayum-tayum. Maaw-awagan pay daytoy maris a natingra nga asul iti “ngila.” Idi un-unana, adu ti mula a tayum-tayum iti daytoy nga ili nga isu ti nakaadawan ti nagan ti munisipio a Tayum.
Manipud Kadagiti Agdama a Kameng ti Bannawag: Dios ti Agngina!
Idi Hulio 27, 2022, napasamak ti ginggined nga agpigsa iti magnitude 7.0 a naisentro a mismo iti daytoy nga ili. Malaksid iti pannakaperdi ti simbaan ti Tayum a patrona ni Santa Catalina de Alejandria, naburbor pay daydi orihinal a monumento ni Heneral Luna iti plasa a nabangon pay idi 1938 wenno sakbay pay laeng idi ti Maikadua a Gubat, panawen a panagmayor daydi Apo Severo Brillantes.
‘Toy numo ti dinutokan ni Mayor Eduarte Jr. a mangpabaro wenno mangdisenio iti nasao a monumento ni Heneral Luna, agraman baro a pundasionna, babaen ti tulong ni Eric Tauro, kapatas a nangimaton kadagiti trabahadorna. Ni met Aladin Agbada nga eskultor a taga-Paete, Laguna ti nangaramid iti estatua, idinto a ni Apo Joel B. Manuel a nobelista ti Bannawag ti nagpatulongak a nangipatarus iti lapidana a Tagalog iti Ilokano. --O
Magatang ti Bannawag kadagiti sukiyo nga aglaklako iti pagiwarnak ken magasin.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, 09171360110.
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
