Salaysay ni MANCIELITO S. TACADENA
ADDAAK iti elementaria idi rugiak ti agbasa iti Bannawag nga urnong daydi lelangko a Lourdes, ta isu ti aggatgatang idi. Immuna a nakaawis iti imatangko dagiti komiks, nangruna ti nobela ni Levi Pabalan maipanggep iti basketball team a Sugar Barons ken ti sumasargo (nalipatak laeng ti paulodan), kasta met ti “Dara iti Rupa ti Bulan” ni Reynaldo A. Duque, ti “Petro versus Laharman” a nobela ni Cles Rambaud idi kalkalpas a bimtak ti Mt. Pinatubo, ken asino ti makalipat iti “Kumpay ni Patay” (nobela a komiks met la ni Cles Rambaud) a nangpatadem iti kasta unay kadagiti pandayen ni Lakay Gusting a tadi ti manok? Anian ta uray la a mabagbagisan ti kalaban a manok a matiruan ti tadi a nayasa iti kumpay ni Patay!
Di nagbayag, basaekon amin a linaon ti magasin. Nakatulong ti panagbasak kadagiti sarita ken nobela tapno saanak a marigatan nga agputar iti script ken istoria a kasapulan nga ipasa iti pagadalan nangruna idi mangrugiakon iti kurso a Mass Communications. Adda daydi maysa a sarita nga impasak kas final project sakbay nga aggraduarak a pinadasko nga impatulod iti Bannawag idi 2002, ngem saan a pimmasa. Saankon a pinidua ti nagipatulod ket impasnekkon ti nagsapul iti trabahok kalpasan ti panaggraduarko iti kolehio.
Kalpasan ti makatawen, idi 2003, napasamak ti panagaluyo iti kaaduan a paset ti Amianan a Luzon a pakairamanan ti Ilocos Sur. Nakaawatak iti text message manipud ken ni Bannawag Editor Cles Rambaud nga agdamdamag no adda naapektaran a mangngalap nga asideg kaniak ken no mabalinko a yaramidan iti salaysay. Nalagipko ti naipadamag nga agama a taga-Sabang, Cabugao a naiwawa iti taaw gapu iti aluyo. Dagus a napanko kinapatang ida tapno isalaysayda ti padasda bayat ti sumagmamano nga aldaw nga agkatangkatangda iti taaw. Impatulodko a dagus ti salaysay babaen ti koreo ket tunggal lawas a pinadpadaanak ti iruruarna iti Bannawag.
Marso 2003 (kaskastrekko la unay iti NBN 4 Vigan kas reporter) idi rummuar ti salaysay. Ay, ket instant celebrity-ak metten kadagiti kakabagiak a nakabasa. Diak ammo ti aramidek, kayatko manen ti makaipablaak ngem kasano? Diak met linia ti agsurat iti sarita ken daniw. Isu a panagsurat iti damdamag ken panagala iti retrato ti inobrak. Ad-adda a dagiti aktibidad ti gobierno probinsial ti Ilocos Sur ti impatulodko iti Bannawag, kas paset ti trabahok a kas government mediaman. Adda dagiti nagkuna a “pagpapogi” la kano kadagiti politiko ti ar-aramidek a panagipatulod iti press releases. Ngem intuloyko latta ti nagipasa isu a dandani linawas nga adda maipablaak nga impatulodko iti Damdamag/Ammuem Pay Daytoy ken Tao, Lugar, Pasamak a benneg ti magasin. No adda dagiti topiko wenno pagteng iti Ilocos Sur a mabalin a yaramidan iti salaysay, ipatulodko latta met ket kaasi ti Apo, maipablaak met.
TURISMO: Intayon Idiay Ayuyang Garden iti Pila, Siudad ti Laoag!
Idi 2007, nagawidak idiay Ballesteros, Cagayan. Ditoy a nakasangok iti inninuman ni ulitegko a Jose Recacho “Antokoy” Madriaga Jr. Ket idi mayaten ti agus ti arak, kinunana nga aramidek nga istoria iti Bannawag ti life story-na. Wen, kunak lattan nupay awan ti ammok a suraten maipanggep kenkuana. Idi makasubliak iti Ilocos Sur, inrugik ti nagputar iti makapakatawa a sarita babaen ti panamagtitiponko kadagiti misadventures a mangmangngegko iti aglawlaw ti media community. Ditoy nga inserrekko ti nagan ni Uliteg Antokoy a kas karakter. Impatulodko iti Bannawag. Idi maipablaak, in-text-ko idiay Cagayan ket impadamagda a bitbit ni Uliteg Antokoy ti kopia ti Bannawag a nakaipablaakan ti sarita nga “Antokoy” iti tunggal papananna a lugar ket ipabasana kadagiti kainninumanna. Napasarunuan pay dayta iti sarita a “Ket Dimmanon ni Uliteg Antokoy” ken “Antokoy, Para Mayor” (ngem dinan nabasa ti naudi ta pimmusayen idi).
Gapu met iti “Antokoy Trilogy,” aw-awagandakon iti “Antokoy” iti Kapitolio. Ditoy a napanunotko nga usaren ti “Kumander Antokoy” a kas pseudonym iti programak iti lokal a telebision agingga iti 2013 a pannakaiyakarkon iti pagopisinaan. Nakumikomak iti trabahok ket naisardengko ti agsurat iti Bannawag. Immabot iti sangapulo a tawen sa pinadako manen ti agipatulod iti damdamag ken retrato a kas iti sigud nga ar-aramidek. Nakitak ngamin nga addan Facebook page ken website ti Bannawag, a kayatna a sawen a nalawlawan ti scope ti magasin. Dagdagusek met nga i-share dagiti maipablaak iti website ti Bannawag kadagiti social media account-ko. Dagiti met maipablaak iti printed edition, alaak iti ladawan sako i-post.
Itay nabiit, pinadasko manen ti nagipatulod iti salaysay. Saan ngamin a pimmasa ti dua nga impatulodko nga ababa a sarita isu nga iti laengen salaysay ti panubbotak, nakunak iti bagik. Pinagsarunok nga impatulod ti dua a salaysay. Iti Nobiembre 16-30, 2023 a bilang, rimmuar ti salaysay nga “Intayon Agkape Idiay Ilocos Sur!” Naidumduma ti rikna no makaipablaakka ket nakunak a sapay koma ta pumasa ti maikadua a salaysayko, isu a padaanak latta.
Dinto magatadan ti agbalin a paset ti Bannawag. Uray pay nabayag a diak nagsursurat, inawatdak latta ken impablaakda latta dagiti gapuanak isu a nupay akuek nga adda mudmudel ti plumak, agsuratakto latta iti Bannawag. Maasanto latta ket tumadem. Kuna kano ngarud daydi Uliteg Antokoy idi ipakpakitana kadagiti barkadana ti sarita a nagbidaanna: “Writer, kunam man!” --O
Ti autor: Nayanak diay Ballesteros, Cagayan idi Marso 21, 1982 ngem agnaed ita iti Namruangan, Cabugao, Ilocos Sur. Naggraduar iti kurso nga AB English/Masscomm iti University of Northern Philippines idi 2003. Pasado iti Kapisanan ng mga Brodkaster ng Pilipinas (KBP) Accreditation. Nagpaay kas reporter/scriptwriter iti NBN4 Vigan (PTV Ylocos itan) manipud Marso 2004 agingga iti Hunio 2010. Nagpaay met a kas program director iti Around Ilocandia Channel ken anchor host ti programa a Morning with Antokoy/Antokoy in the Haus manipud Hulio 2010 agingga iti Pebrero 2013. Iti agdama, agpapaay a kas Project Evaluation Officer II iti Provincial Planning and Development Office iti Kapitolio ti Ilocos Sur.
Magatang ti Bannawag kadagiti sukiyo nga aglaklako iti pagiwarnak ken magasin.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, 09171360110.
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
