Uppat a tao ti natay, idinto a 50 ti nadangran idi bimtak ti maatap nga improvised explosive device (IED) iti maysa a gymnasium iti Siudad it Marawi itay Disiembre 3.
Dinayyeg ti bimtak a bomba ti Dimaporo Gymnasium iti Mindanao State University (MSU) iti Marawi bayat a maar-aramid ti maysa a misa para iti umuna a Domingo ti Adbiento dagiti estudiante a Katoliko idiay.
42 ti naipan iti Amai Pakpak Medical Center ken 8 ti naitaray iti Infirmary Hospital ti MSU gapu iti pannakadangran.
Kinuna ni Major General Gabriel Viray III, Commander ti 1st Infantry Division (1ID), a daytoyen ti karanggasan a pannakaraut iti Islamiko nga Estado manipud idi napasamak ti makunkuna a "Marawi Siege" idi 2017, a nakatayan ti agdagup iti 978 a terorista, 168 a soldado, ken 87 a sibilian, ken nakadangran ti 1,400 a tao.
Manipud Kadagiti Agdama a Kameng ti Bannawag: Dios ti Agngina!
Segun ken ni Viray, palpalutpoten pay laeng dagiti kameng ti militar no asino dagiti adda iti likudan ti panangbomba, ngem pattapattaenda a mabalin a panangibales daytoy dagiti grupo a Maute a kameng ti grupo a Daulah Islamiyah (DI) nga addaan pakainaigan iti IS, ta addada iti Lanao del Sur.
Itay Disiembre 1, inwayat ti 6th Infantry Division (6ID) ti airstrike ken panangraut kadagiti kameng ti DI iti Datu Hoffer Ampatauan iti Maguindanao del Sur a nakatayan dagiti 11 a militante.
Kinarinnanget pay ti militar dagiti militante a DI iti Piagapo, Lanao del Sur iti agsapa ti Disiembre 3, a nakatayan ti maysa kadagiti nangato nga opisial.
Innayon ni Viray a pinagridamnan amin a kameng ti militar, idinto a palpalutpotenda no asino dagiti nangaramaid it idayoty ken ti mabalin a motiboda. (Martin Sadongdong/Manila Bulletin//Lito Hilidon/Bannawag)
