Salaysay ni ALFREDO E. VERZOSA
MANIPUD iti Session Road ti Baguio City, a kalsada a pannakaentabladona a pagpabpabuyaanna nangruna iti aldaw ti Domingo, nagsubli iti Tayum, Abra ni Daryl Verzosa, 27, ti nalatak a mannala a “Daryl Jackson” a mangim-impersonate ken ni Michael Jackson, tapno ag-perform para kadagiti kailianna.
Naipasngay iti Bontoc, Mt. Province ken agnanaed ni Daryl iti Baguio ngem maibilang a maikadua a pagtaenganna ti Tayum ta tubo ditoy nga ili ti tatangna a ni Hernando Elveña Verzosa, retirado nga opisial ti Philippine Navy ken adien ‘toy numo (autor).
Adun a video ti panagsalsala da Daryl Jackson ken ti grupona iti Session Road ti agbay-viral iti social media, kangrunaan iti Facebook ken YouTube. Inimbitaran ti munisipio ti Tayum ni Daryl tapno agpabuyada iti gymnasium iti plasa ti Tayum idi rabii ti Nobiembre 23, 2023 kas paset ti makalawas a “Pabuya ken Parambak, Pagyaman iti Patronak” a piesta ni Santa Catalina de Alejandria a patrona ti ili.
Makapleng ti ikkis, dir-i, ken sipsipat dagiti agbuybuya iti laing ni Daryl Jackson a mangtulad iti langa, pagan-anay, nangruna ti panangsalana nga eksakto a maalana ti tignay ken paragsit ni Michael Jackson aglalo ti panag-“moonwalk”-na.
Manipud Kadagiti Agdama a Kameng ti Bannawag: Dios ti Agngina!
Kadua ni Daryl ti tallo a dancer ti grupona a 2600 Moonwalkers, namimpatda a nagsala kabayatan ti nadumaduma a programa iti dayta a rabii. Nagpaay ni Prinzelle Princena Verzosa, a kasinsin ni Daryl, a kas videographer. Ni met Fides Molina Escalante ti emcee iti dayta a rabii.
Dagiti agassawa a da sigud a congressman ken agdama a mayor ti La Paz Joseph ‘JB’ Bernos ken Congresswoman Menchie ‘Ching’ Bernos dagiti kangrunaan a bisita iti dayta a rabii ti “Pabuya ken Parambak.” Naigiddan met ti panamagsapata ni Congresswoman Bernos kadagiti nangabak a sangapulo ket maysa a punong barangay ken 77 a barangay kagawad ti ili a Tayum.
Mairaman kadagiti sponsor iti panagpabuya da Daryl ken ti grupona ti Heritage Promotions ti Baguio City babaen ken ni Ms. Chi Balmaceda Gutierrez, ti RBF (Romeo Brillantes Farm) Bamboo Farming nga imatonan ni Teddy Brillantes, ken ti gobierno munisipal ti Tayum nga idauluan ni Mayor Placido ‘Glen’ Eduarte.
MANIPUD pay idi agtawen iti 7, agessemen ni Daryl iti panagsala, nangruna kadagiti napardas a sala. Mayat ti lunglung-ay ken panagkompasna kadagiti naparagsit a tokar, kasla awan pulos pannakabannogna no agsala. Kaduana idi dagiti kataeb ken kakasinsinna a babbai a suruanna nga agsala iti steps ni Michael Jackson no kasta nga agbakasionda a sangapamilia ditoy Tayum. Idiay idi nalawa a plasa ti Tayum ti pagsasalaanda nga agkakasinsin.
Adu dagiti naikappenganna a grupo a sumasala idiay Baguio kas iti UC Fuego a nabukel idi 2015 iti University of Cordilleras a pagbasbasaanna; ti No X’QZ (No Excuse), ken ti Rhythmus Dance Studio, a pagisursuruanna kadagiti estudiante nga agessem iti panagsala. Kadagitoy a grupo, kaaduan nga isu ti choreographer ken mangise-set-up kadagiti video camera a pangirekordda. Nasursurona pay ti filmography, video/audio editing/splicing kasta met a metikuloso isuna no maipapan iti photography. Ken nalaing pay a pumirit iti gitara.
Ni Daryl ti inaunaan iti tallo nga annak da adingko a Hernando ken kaingungotna a Susana Licawen, maestra a taga-Sadanga, Mt. Province. Ni Maria Ysabelle nga adingen ni Daryl, naggraduar itay napan a tawen a cum laude iti Philippine Military Academy ken maysan nga Ensign iti Philippine Navy; idinto a ti buridek a ni Raymund, kalkalpasna met ti Forensic Science iti University of Cordilleras (a nagbasaan met laeng ni Daryl iti kurso a Computer Science).
Baro pay ni Daryl, ngem naitudingen ti panagkallaysada iti daytoy a Disiembre iti Baguio Cathedral iti nabayagen a nobiana a ni Nadine Guiniling, balasang a taga-Kiangan, Ifugao ken nagturpos iti Accountancy iti Saint Louis University.
Mabalin a buyaen dagiti video ni Daryl Jackson, i-like, i-follow, ag-subcribe laeng kadagiti social media accounts-na ken ti grupona iti Facebook: https://www.facebook.com/dryljcksn ken https://www.facebook.com/darylpeterpaul.verzosa; YouTube: https://www.youtube.com/@DarylVerzosa; ken iti Instagram: https://www.instagram.com/darylpplv
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, 09171360110.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
