Palpalutpoten ti Armed Forces of the Philippines (AFP) ti kinapudno iti panangaklon ti grupo ti terorista nga Islamic State of Iraq and Syria (ISIS) nga isuda ti makaigapu iti pannakabomba ti gymnasium ti Mindanao State University (MSU) iti Siudad ti Marawi a nangkettel iti biag ti 4 a tao, ken nadangran iti 50.
Kinuna ni AFP public affairs office chief Col. Xerxes Trinidad a palpalutpotenda met no karaman ti DI (Daulah Islamiya)-Maute Group iti pannariribuk ti Marawi.
Segun ken ni Department of National Defense (DND) Secretary Gilberto Teodoro Jr. itay Disiembre 3, adda dagiti pakakitaan nga adda "ganggannaet nga elemento" a karaman iti panangbomba.
Patien ni AFP Chief General Romeo Brawner Jr. a mabalin a panagibales ti makaigapu iti pannakabomba ti Marawi, idinto a naballigi ti panagtignay ti AFP maibusor kadagiti grupo a Daulah Islamiyah, ngem saanen daytoy a nangted iti dadduma pay a detalye, di la ket ta agpeggad ti panagtignay dagiti militar. (Martin Sadongdong/Manila Bulletin//Lito Hilidon/Bannawag)
