Binabalaw ni Senador Raffy Tulfo ti mapaspasamak a diskriminasion kadagiti nagturpos iti senior high school gapu ta ipangpangruna pay laeng ti kaaduan a kompania nga awaten dagiti nagturpos iti kolehio.
Iti panagtataripnong dagiti kameng ti Committee on Higher, Technical and Vocational Education ti Senado itay Disiembre 4, kinuna ni Senador Tulfo a naipanamnama kadagiti nagturpos ti Senior High Program ti pannakagun-odda iti panggedan idinto a manamnama a naadalan ken nasursuruandan kadagiti kasapulan ti industria.
Dinillaw ni Tulfo dagiti kompania a "college graduate" laeng ti awatenda idinto a para makinilia wenno receptionist laeng ti ididiayada a trabaho, ket maidumduman dagiti nagturpos iti senior high school. Kinuna ni Tulfo a rumbeng a mabaliwan daytoy.
Innayon ni Tulfo a dagiti laeng industria a kas iti construction, food and beverage, BPO, ken food processing ti agaw-awat kadagiti nagturpos iti K to 12.
TURISMO: Intayon Idiay Ayuyang Garden iti Pila, Siudad ti Laoag!
Dinakamat pay ni Tulfo ti panagsukisok nga inwayat ti Philippine Business for Education a nangibaga a 20 a porsiento laeng kadagiti 70 a dadakkel a kompania iti amin a sektor iti pagilian ti agaw-awat kadagiti nagturpos iti senior high school.
Imbatad ni Department of Labor and Employment (DOLE) Undersecretary Carmela Torres nga iti 9,000 a bakante a trabaho iti naiwayat a job fair idi Disiembre 2022, 116 laeng ti naala a kas kahera, sales agent, ken service crew.
Kinuna ni Tulfo a dakkel a parikut ti di maitutop a kurikulum ti eskuela iti aktual a kasapulan ti industria, kangrunaan iti senior high school ngem mabalin a marisut babaen ti makunkuna nga enterprise-based training program (EBET).
Innayon ni Tulfo a malaksid iti insentibo iti buis, mapadayawan pay dagiti kompania a mangawat kadagiti senior high school no maipatungpal ti gakat nga EBET. (Dhel Nazario/Manila Bulletin//Lito Hilidon/Bannawag)
