Salaysay ni VIRGINIO B. FARIÑAS
DIAK pay ammo ti agbasa, aguk-ukradakon iti Bannawag. Linawas a gumatang daydi nanang ta dina maliwayan a basaen dagiti pagay-ayatna a nobela ken sarita. No idissona ta awan ob-obraek, ukradek met a buyaen dagiti ladawan ti komiksna.
Siak met ti kanayon a baonen daydi nanang a mapan gumatang ta siak ti katudioan a baonenna kadakami nga agkakabsat no ti pagatangna ket Bannawag. Siak laeng ken ni nanang ngamin ti adda interesna a mangukrad. Pagpagnaek ti agdua kilometro a kalsada a no katutudona ket nalubo ken natapok no kainitna.
Iti naminsan a binaonnak daydi nanang a gumatang iti Bannawag, inibbatak ti pastorko a nuang iti uneg ti inaladanmi a pagpapaarabak iti nalangto a ruot ti maratultulang iti baet dagiti mula a saba daydi tatang. Diak impagarup a kayat ti nuang ti bulong dagiti kaimulmula a subual. Sinulsulnotna dagitoy. Idi sumangpetak, gumaygayebgeb ti pungtot daydi tatang a nangipasabat kaniak iti agkakamakam nga ablat iti bukot ken patongko. Diak met ketdi ladingiten ti sakit ken binatlag iti bukot ken patongko ta basolko met ngem ti nagsangitak ket ti panangpigispigisna iti daydi kagatgatangko a Bannawag a puon ti nagapaanda iti daydi nanang. Binallaagannak pay daydi tatang nga iti kanito a makitana pay nga agiggemak iti Bannawag, pagparintumengennak kano iti sangabigao a balatong iti kainaran. Ngem diak inkankano ti pangtana, ilibaslibasko latta ti mangukrad iti Bannawag ta siguro, nailuodakon.
Idi agangay, maysaak metten kadagiti ubbing ken babbarito nga agisursor iti lakomi a Bannawag. Maysa a sentimo ti komisionko iti tunggal kopia a mailakok. Mapnekak iti daytoy a trabahok ta adda la ngaruden matgedak, makalibreak pay a mangukrad iti Bannawag ken mangbuya iti komiksna a saan a makitkita daydi tatang ta diak met yawid idiay balaymi. Itugawko no kua ti agukrad iti sirok ti dakkel nga akasia iti igid ti kalsada nga adayo iti balaymi.
TURISMO: Intayon Idiay Ayuyang Garden iti Pila, Siudad ti Laoag!
Saanak idi a maawanan iti kuarta ta malaksid iti panaglakok ti Bannawag, ag-shine-ak pay iti sapatos iti Mierkoles ken Sabado nga aldaw ti dapon iti ilimi a Gattaran. Ket no dadduma, yarikapak iti singko wenno dies sentimos ni tatang nga isukmonna iti Gin 7 wenno Cruz de Oro. Idi damo nga ikkak, nakarupanget a nagsaludsod no nangalaak iti kuartak. Kapilitan nga imbagak a nakomisionko iti panaglakok iti Bannawag. Isu nga idi agangay, saannakon a pawilan nga agiggem iti Bannawag.
Nalakaak a nakasursuro nga agbasa ti Ilokano ta insuronak daydi nanang a nangisursuro met idi iti caton. Isu nga idi damok ti sumrek iti pagadalan, ammokon ti agbasa iti Ilokano. Isuna laeng ta no pagbasaendak idi iti English, katkatawaandak ta basaek a kasla iti panangbasak iti Ilokano.
Ti malagipko a nagdamdamoak a binasbasa a nobela iti Bannawag ket ti "Ti Pagbubutngan iti Sierra Madre" ken ti "Singin ti Sinukuan" nga agpada a sinurat ni Nemesio E. Caravana. Ket ti met komiks, ti "Hagibis" ni Francisco V. Coching ken ti "Kenkoy" ni Tony Velasquez.
Idi nakadap-awak iti sekundaria, kasla addan obsesionko iti Bannawag ta nangrugin nga agrusing ti arapaap, essem, ken reggetko nga agbalin koma met a mannurat. No adda magustuak idi a daniw a mamagpikapik iti riknak, adawek no kua ti dadduma a liniana a pangsupusopko iti suratko iti ar-armek a balasang. Banag a daydayawen dagiti kapatadak a no dadduma, siak payen ti pagaramidenda ti love letter-da. Pinadasko met ti agsuratsurat iti daniw ngem agpatingga la a maikupin iti kuadernok. Pinadpadasko pay ti nagsurat iti sarita ngem awan nairingpasko.
Uray idi addaakon iti kolehio nga agad-adal iti University of Manila (a nagbasaan met idi ni Editor Dionisio Bulong), saan a nagmawmaw ti ragut ken essemko nga agbalin koma a maysa a mannurat, a makapaipablaakak koma met iti Bannawag iti bukodko a sinurat.
Adda idi nakaklaseak iti maysa a subject a napagus met nga agsuratsurat iti daniw. Inkuyognak iti naminsan iti opisina ti Bannawag idiay Soler St., Sta. Cruz, Manila. Adda idi daniwna nga insumiterna. Impagarupko no daydin ti rangtayko tapno lalo a mayasidegak iti Bannawag tapno matun-oyak ti arapaapko.
Ngem saanen a nasunotan daydi a pannaisar-ongko iti paraangan ti Bannawag. Naikamengak iti Philippine Air Force a kas maysa nga enlisted man ket nadumaduma a lugar ti nakaidestinoak. Idi naideklarar ti Martial Law, maysaak kadagiti umuna a pito a napili nga agserbi a kas Flight Marshall a mangipaay iti seguridad kadagiti pasahero dagiti domestic flight nga agbaniaga iti nadumaduma a disso ti Filipinas. Gapu iti kastoy a kasasaad ti trabahok, nagbalin a ganggannaet kaniak ti Bannawag iti naunday a panawen.
Nupay kasta, idi agretiroakon iti serbisio ken nagtalinaedakon iti ilimi, simminged manen ti pannakitakunaynayko iti Bannawag. Narubroban met daydi arapaapko a makapagsurat aglalo idi indiaya kaniak ni Apo Arthur Urata ti panagmiembrok iti GUMIL Cagayan. Isuna idi ti presidente ti gunglo.
Damok ti nakadar-ay iti national convention ti GUMIL Filipinas idi sinangaili ti GUMIL Cagayan daytoy iti Callao Caves Resort idiay Peñablanca. Ditoy ti nakaam-ammuak kadagiti bangolan a mannurat a pakaibilangan daydi Apo Juan S.P. Hidalgo Jr., a nangisingasing nga agsuratak iti maipapan iti Air Force.
Ngem sabali ti napanunotko nga isurat ta madama idi nga agsansanay ti buridekmi iti Special Action Force (SAF) ti Philippine National Police. Daytoy ti inyaramidak iti salaysay. Pinauluak iti "Kayatmo ti Agpolis, Nakkong?" Impabasak ken ni Apo Arthur Urata para iti komentariona. Adda dagiti nakitana a masapul nga aturek. Idi namnamaek a mabalinen, impabasak manen ken ni Apo Arthur. Nag-thumbs up. Impatulodko iti Bannawag.
Disiembre 2003, iti maysa nga aldaw ti Sabado sakbay a mangaldawkami, immay iti balaymi ti ipag ni baket. Impadamagna nga adda nangibaga kenkuana nga adda kano met naganko iti Bannawag.
Daytay ket ngata salaysaykon daydiay? Kunam pay, gapu iti gagarko, diakon masursurotan ti aramidko. Tinalawak ti nakadasar a taraon ket nagdardarasak a nagpaili tapno gumatang iti Bannawag. Ket idi maimutektekak ti sinuratko, nangruna ti naganko, iti panid ti Bannawag, anian a ragsakko! Kasdiay gayam! Nalabit, awan siasino man a makarukod iti aglalabbet a gagar, rag-o, ken umat-atimpayok a morale a mangitaltal-o kaniak iti dayta a kanito. Diak payen marikna ti bisin! Kasdiay gayam!
Adu met a pammadayaw ti naaw-awatko iti kaaddak iti serbisio militar a nakaipaay kaniak iti rag-o ken pannakkel, kas kadagiti medalia a pammigbig kadagiti naisangsangayan a nagapuanak a pakaibilangan ti tallo a triple M (Military Merit Medal), sumagmamano nga MCM (Military Commendation Medal), adu a letters of commendation, citations, promosion, kdp. Ngem para kaniak, sangasabalian ti damo a pannakaipablaak iti Bannawag ta naisalsalumina a rikna ti insangbay kaniak ti nagpessa nga arapaap nga inuk-ukopan ti bayanggudaw a panunotko iti agarup lima a dekada.
Nalaus a panagyamanko iti amin a pagtamtamedak a mannurat, nga isuda ti nagbalin nga inspirasionko tapno agsurat met. Mairaman ditoy da Appo Constante Casabar, Greg Laconsay, Dionisio Bulong, Cles Rambaud, Ariel Sotelo Tabag, Jose Bragado, Eliseo Contillo, Juan S.P. Hidalgo Jr, Roy V. Aragon, Freddie Pa. Masuli, Juan Al. Asuncion, Martin Rochina, Jobert Pacnis, Meliton Brillantes, Norberto Bumanglag, Proddie Gar. Padios, Jovito Amorin, Jun Seguro, Johmar Alvarez, Daniel Nesperos, Prescillano Bermudez, Fernando Sanchez, Pete Duldulao, ken dadduma pay a nakalibas iti lagipko.
Naimpusuan a panagyaman ken ni Apo Arthur Urata Sr. a nangat-atibay kaniak tapno agballigiak a makapaipablaak iti Bannawag. Ngem iti ringbaw iti amin, ammok unay nga awan ti umdas a balikas a mangipeksa ti nalaus ken naimpusuan a panagyamanko ken ni Apo Bannawag a nangipaay kaniak iti saan a magatadan a ragsak ken liwliwa a saan laeng nga apagdarikmat agsipud ta agpapan a nalawag pay dagiti matak ken isipko, ikagumaanak a sapulenka, Bannawag, a manglinglingay ken patinayon a mamagtignay kaniak. --O
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, 09171360110.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
