Bimmaba iti 4.1 a porsiento ti implasion iti pagilian itay Nobiembre, nababbaba ngem iti 4.9 a porsiento idi Oktubre daytoy a tawen, idinto nga 8 a porsiento idi napalabas a tawen.
Ti implasion (inflation) ket isu ti panagngato ti presio dagiti magatgatang ken serbisio.
Nupay ninamnama dagiti ekonomista ken negosiante ti panagbaba ti presio dagiti magatang iti Nobiembre, ngimmina met ti bagas iti 15.8 a porsiento, manipud iti 13.2 a porsiento idi Oktubre.
Segun ken ni Carlos Manapat, a daulo ti Economics Department ti University of Santo Tomas, saan a nagkuti ti implasion idi Nobiembre gapu iti panagbaliwbaliw ti presio ti krudo iti sangalubongan, a nangpatalged iti presio dagiti magatang.
Manipud Kadagiti Agdama a Kameng ti Bannawag: Dios ti Agngina!
Nupay kasta, inlawlawag ni Manapat a manamnama a ngumato ti implasion iti Disiembre ta dumakkel ti panagrikus ti kuarta, ken umadu ti aggastos para iti Paskua.
Pinatalgedan ni Steven Cua, presidente ti Philippine Amalgamated Supermarkets Association (PAGASA), a saan a naggaraw ti presio dagiti kangrunaan a produkto sipud iti maudi a tallo a bulan ti tawen.
Kinuna ni Cua a ti suplay dagiti produkto a para iti Paskua ti mangidiktar iti ingingina wenno panaglaka ti presio dagitoy. (Miguel Gil/PNA//Lito Hilidon/Bannawag)
