Impakita ti Philippine National Police (PNP) itay Disiembre 6 ti ladawan ti dua a maatap nga adda pannakainaigda iti pannakabomba ti Siudad ti Marawi a nakatayan ti uppat a tao, ken nangdangran iti adu pay a sabsabali.
Nabigbig dagiti dua a suspek a da Kadapi Mimbesa, alias "Engineer" ken Arsani Membisa, alias "Khatab," nga agpada a kameng ti Daulah Islamiyah-Maute Group, idinto a pugante dagitoy gapu iti kaso a panangpapatay.
Segun ken ni PNP spokesperson Col. Jean Fajardo, maibatay iti ala ti CCTV itay Disiembre 3, nagturong dagiti dua iti gymnasium ti Mindanao State University (MSU) iti 6:27 ti agsapa, idinto nga adda awit ni Arsani a bag a mabalin a naglaon iti bomba. Sakbay a bimtak ti bomba, rimmuarda a dua iti MSU, sa adda inawagan ni Kadapi iti selponna, a mabalin a nangpabettak iti bomba. Kalpasanna, sidadaras a rimmuarda iti MSU.
Natakuatan pay ti PNP nga improvised ti bomba a naaramid babaen ti 60mm mortar ken rifle grenade, agraman TNT. (Aaron Recuenco/Manila Bulletin//Lito Hilidon/Bannawag)
