Inlawlawag ti National Food Authority (NFA) kadagiti kameng ti Committee on Agriculture and Food ti Kamara itay Disiembre 6 a ngumina ti bagas ita a Disiembre gapu iti ingingina met ti bagas iti sangalubongan a merkado.
Kinuna ni NFA Administrator Roderico Bioco a nasken a maaddaan ti pagilian iti sabali pay a paggapuan ti bagas ken mabennat ti suplay bareng makontrol ti presio idinto a kunana a pudno a makapaidagel kadagiti konsiumer ti ngumatngato a presio ti bagas iti sangalubongan a merkado.
Inyebkas ni Deputy Majority Leader ken ACT-CIS Party-list Rep. Erwin Tulfo ti luksawna iti saan a natungpal a kari a nababa a presio ti bagas, idinto a mapanen a PhP52 agingga PhP60 ti sangakilo a bagas.
Pinalutpot ni Tulfo no apay ta saan a lumaklaka ti bagas.
Manipud Kadagiti Agdama a Kameng ti Bannawag: Dios ti Agngina!
Imbinsabinsa ni Bioco dagiti makaigapu iti ingingina ti bagas a kas iti nakurang nga apit idi 2021 ken 2022, saan unay a panagusar dagiti mannalon iti ganagan, nangatngato a presio ti ma-import a bagas ngem ti presiona no mailako kadagiti konsiumer, ken ti panggep ti Indonesia a gumatang ti 2 a milion a tonelada a bagas iti internasional a merkado.
Segun iti dadaulo ti NFA, agsapulda iti sabali pay a paggatangan ti bagas a saan laeng a ti Vietnam ken Thailand tapno malapdan ti agtultuloy nga ingingina ti bagas. (Dexter Barro II/Manila Bulletin//Lito Hilidon/Bannawag)
