Binilin ti Land Transportation Office (LTO) dagiti kaasmangna nga ahensia a saanda pay laeng a tiliwen dagiti lugan a nagpason ti rehistrona iti nasurok a makatawen.
Ngem inlawlawag ni LTO chief Vigor D. Mendoza II a mapalukayan laeng ti "No Registration, No Travel" iti las-ud ti nabatbati pay nga aldaw ti Disiembre, ket agsubli kalpasan ti Baro a Tawen.
Iti datos ti LTO, agarup 24.7 a milion dagiti lugan a nagpason ti rehistrona, idinto nga adda 38.3 a milion a lugan iti entero a Filipinas. Kaipapananna, 65 a porsiento dagiti amin a lugan iti pagilian ti nagpason wenno awan ti rehistrona.
Kinuna ni Mendoza a naibatay ti desision ti LTO iti anag ti Paskua, wenno saanda kayat a dadaelen ti panangrambak dagiti tattao iti Paskua.
TURISMO: Intayon Idiay Ayuyang Garden iti Pila, Siudad ti Laoag!
Segun ken ni Mendoza, naidanonen daytoy a bilinna kadagiti amin a LTO Regional Director ken daulo ti Law Enforcement Service, ket naibilin kadakuada a saanda a tiketan, no di ket ballaaganda pay laeng dagiti drayber ti lugan a nagpason ti rehistrona. (Aaron Recuenco/Manila Bulletin//Lito Hilidon/Bannawag)
