Adu latta a Filipino ti mabikbiktima iti human trafficking, ken agtungpalda a biktima ti "love scammer" iti ballasiw-taaw iti laksid ti nasged a panangbalballaag ti gobierno iti publiko, kas kinuna ni Bureau of Immigration (BI) Commissioner Norman Tansingco itay Disiembre 10.
Kinuna ni Tansingco a binallaagandan ti publiko idi pay Oktubre itay napan a tawen, ngem adda latta mabikbiktima iti palso nga ididiaya dagiti iskamer iti ballasiw-taaw.
Inyebkas ni Tansingco ti pannakaupayna kalpasan a mapaawid itay Disiembre 8 ti 27 a Filipino a napuersa nga agtrabaho iti Cambodia a kas "love scammer" a mangpumpuntiria kadagiti lallaki iti United Kingdom. Sumagmamano kadakuada ti naabuso ken naparparigat iti pagtrabahuanda, ket kalpasanna, ilako ida ti amoda nga Intsik iti sabali a kompania.
Ngem yaman pay, kuna ni Tansingco, ta insalakan ida dagiti polis ti Cambodia ken tinulongan ida ti Embahada ti Filipinas iti Phnom Penh.
Manipud Kadagiti Agdama a Kameng ti Bannawag: Dios ti Agngina!
Segun ken ni Tansingco, 12 kadagiti 27 a Filipino ti ilegal a pimmanaw manipud iti Zamboanga a naglugan iti bilog, ken naglayag iti 11 nga oras a nagturong iti Sabah, Malaysia sakbay a nayallatiwda iti Cambodia.
Kinuna ni Tansingco nga empleado ti gobierno ti maysa kadagiti biktima a nagpammarang a turista.
Innayon ni Tansingco a maysa laeng kadakuada ti addaan ti papeles, ngem agturong daytoy iti Palau, saan nga iti Cambodia. (Jeffrey Damicog/Manila Bulletin/Lito Hilidon/Bannawag)
