Amken ni Quezon City 4th district Congressman Marvin Rillo a kameng ti Committee on Energy, ti pangta ti kumarkaro nga El Niño phenomenon iti panagkurang ti suplay ti koriente iti Luzon kadagiti sumaruno a bulan.
Kinuna ni Rillo a ti nakirang a tudo ti mabalin a mangsinga iti panaggaraw dagiti pasilidad a papaganaygayen ti danum a mangiwaras iti koriente iti nadumaduma a paset ti Luzon.
Kiniddaw ni Rillo a kitaen koma ti House Committee on Energy dagiti dakes nga epekto ti napaut a kaawan ti tudo iti planta ti koriente nga agus-usar iti danum (hydroelectric power plants) ken mangipapaay iti 2,416-megawatts (MW) a koriente iti Luzon.
Kinuna ti Meralco ken Aboitiz Power Corp. itay napalabas a bulan a bumassit ti suplay ti koriente iti Luzon inton 2024, no awan ti mainayon a baseload capacity iti laksid ti yaadu dagiti agusar ti koriente.
TURISMO: Intayon Idiay Ayuyang Garden iti Pila, Siudad ti Laoag!
Imballaag met ti Philippine Atmospheric, Geophysical and Astronomical Services Administration (PAGASA) itay Disiembre 6 a kumarkaro pay ti epekto ti El Niño a mangyeg iti tikag wenno nabara a tiempo iti sumagmamano a probinsia ti Luzon.
Segun iti PAGASA, kangitingitan ti El Niño agingga iti Enero, 2024, idinto a saan a maapektaran dagiti probinsia iti Visayas ken Mindanao. (Dexter Barro II/Manila Bulletin//Lito Hilidon/Bannawag)
