Inyusuat ti Department of Agriculture (DA) ti kaunaan nga Agricultural Machinery Design and Prototyping Center (AMDPC) ti Filipinas a mangipaay kadagiti mannalon iti nalaka ken napartuat iti Filipinas a makinaria a pagtalon.
Inwardas ni DA Secretary Francisco Tiu-Laurel ti pannakainagurar ti 2,000-metro kuadrado a pasilidad iti Philippine Center for Postharvest Development and Mechanization (PhilMech) iti Muñoz, Nueva Ecija itay Disiembre 7.
Kinuna ni Laurel a ti moderno ken milion-a-doliar ti gatadna a pasilidad ti mamagbaliw iti panangmatmattayo iti panangpartuat dagiti agrikultural a makinaria ita, idinto a naaddaan dagitoy iti moderno a ramen ti panagaramid, kapintasan a disenio, ken simulation software.
Ibaklay ti Korea International Cooperation Agency (KOICA) ti PhP289 a milion (wenno USD5.780-milion) idinto a PhP81.545-milion ti kukua ti gobierno ti Filipinas tapno mabukel ti AMPDC nga aggatad iti PhP370.545 a milion.
Manipud Kadagiti Agdama a Kameng ti Bannawag: Dios ti Agngina!
Suportaran pay ti Korea Institute for Development Strategy ken ti Korea Agricultural Machinery Industry Cooperative ti proyekto.
Innayon ni Laurel a ti moderno a pasilidad ti agserbi kas maysa a pangiparukpokan dagiti lokal a manufacturer, agricultural engineer, ken managsukisok manipud iti institusion ken pagadalan ti gobierno, kadagiti managpartuat a panunotda tapno maparnuay dagiti kasapulan nga agrikultural a makinaria, teknolohia, ken alikamen. (Ma. Teresa Montemayor/PNA//Lito Hilidon/Bannawag)
