Salaysay ni LEAH GABORNO TABIEROS
IDI ubingak, no lukatak ti daan a lakasami, nakapempen dagiti daan a kopia ti Bannawag nga il-ilalaen unay ni tatangko. Ditoy a nauk-ukagko ti nobela nga “Arlong Buaya,” ti maysa kadagiti di maliwayan idi ni tatangko a basaen iti Bannawag. Sinurat daytoy ti maysa a premiado a mannurat a taga-Aparri, Cagayan. Diak ipagarup idi a maam-ammok daytoy a nalaing ken nalatak a mannurat ti Bannawag.
Iti naminsan a panaggapuk iti pagadalan, nasangpetak iti balaymi nga adda bisita ni tatangko, a patpattak a kataebna laeng. Pinaasidegnak tapno yam-ammonak. Napalalo a siddaawko idi maammuak nga isu gayam ti mannurat a kanayonko a mangngegan ti naganna: Meliton Gal. Brillantes. Diak ammo ta nakariknaak iti napalalo a bain, gapu ngata iti panagtamedko unay ta makitak a natakneng a tao daytoy a nalatak a nobelista ti Bannawag. Saan a mabayag, nagpakadan ket apaman a nakapanaw, dinamagko ken ni tatang no kasanoda a nagam-ammo.
Kinuna ni tatang nga iti maysa a komperensia dagiti kameng ti gunglo dagiti mannurat a GUMIL Cagayan idi 1984 ti nagam-ammuanda ken ni Tata Meliton, dita a nangrugi ti panagsinningedda. Diak ammo a a kameng gayam ti GUMIL Cagayan ni tatangko. Awan met ngamin mais-istoriana maipapan iti daytoy a gunglo. Makitkitak laeng ti sagpaminsan a panagsursuratna ngem awan pay nabasak a naipablaakna iti Bannawag.
Nagbalin a kaarrubami ti Pamilia Brillantes idi agangay ta nagatangda ti bakante a lote a kaabay a mismo ti solarmi. Gapu ta saan pay nga uso idi ti alad iti nagbabaetan, nawaya a makitak ni Tata Meliton iti sanguanan ti makiniliana. No dadduma, makitak nga agpagnapagna iti paraanganda, kasla agpampanunot iti nakaun-uneg. Nangrugi a maburburtiaanak no kasano a buklenna dagiti sarita ken nobelana. Nakasursuruak met idin nga agbasa ket pasaray basaek ti Bannawag lalo dagiti sinurat ni Tata Meliton, nupay marigatanak a mangibalikas kadagiti nauuneg ken saan a popular a balikas.
TURISMO: Intayon Idiay Ayuyang Garden iti Pila, Siudad ti Laoag!
Awan unay panawen ni tatangko iti balaymi ta agtrabaho iti kabangibang nga ili. No adda iti balay, kayatko koma ti agdamag maipapan iti panagsurat iti sarita wenno nobela iti Bannawag ngem diak kayat a singaen lalo no agin-inana. Sa maysa, no awan trabahona ket adda iti balay, gundawayna metten a sanguen ti makiniliana.
Naminsan nga awan klasemi, inturturedko ti immallatiw iti pagtaengan da Tata Meliton. Impambarko a makibasaak koma iti baro a Bannawag ta saankami a nakagatang. Ditoyen a nakaalaak iti gundaway nga agdamag no kasano ti agsurat iti sarita ken nobela. Adu ti inlawlawagna kaniak. Naammuak nga agduma gayam ti ababa a sarita, salaysay ken nobela.
Nagbalin a kasingedko dagiti annak ni Tata Meliton isu nga ad-addan a nawayaak nga umallatiw iti pagtaenganda. Maysa kadagiti pammadayaw a naawat ni Tata Meliton ti nagserbi nga inspirasionko tapno padasek met ti mangbukel iti maysa nga istoria. Pinadasko nga insurat ti kasasaadko nga agad-adal nga iskolar ti munisipiomi. Inturturedko nga impakita ken ni Tata Meliton ti sinuratko. Napaisem laeng. Insurona ti nasken nga aramidek tapno makabukelak iti naurnos a sarita. Kinunana a saan nga umno ti panangaramatko kadagiti panilpo ken ispeling. Madi ti riknak a nagawid. Manipud idi, saankon a sinunotan pay ti nagsurat aglalo ta asidegen ti panagturposko iti sekundaria.
Dandani inaldaw nga adda makitkitak a bisita ni Tata Meliton. Padana a mannurat wenno dagiti agsursuro nga agsurat. Immapalak met a makasursuro. Ngem maunaak ti agbain a mapan manen agpaisuro. Kayatko ketdi latta nga ituloy ti narugiak a panagsuratsurat. Ngem adu met ti pakakumikomak iti pagadalan isu a diak manen naas-asikaso.
NAMINSAN a nakariingak, alas dos iti parbangon. Tumanakatak pay la ti makinilia ni tatang. Nakasindi pay laeng ti silaw iti salas. Nagin-inayadak nga immasideg. Dinamagko no ania ti pagpuypuyatanna ngem saan a simmungbat. Intuloyna latta ti sursuratenna . Nakaisemak a nagtugaw iti abayna a nangbasa iti maysa a panid ti sursuratenna. Sa intemplaak iti kape kalpasanna. Insardengna ti agmakinilia ket inisemannak sa simmimsim iti kape. Nagsubliak a naturog. Maay-ayatanak no kasta nga agsursurat met ni tatangko ta kasla ni Tata Meliton ti makitkitak nga agmakmakinilia.
Iti maysa nga aldaw, naragsak a simmangpet ni tatang manipud iti trabahona. Adda iggemna ti Bannawag. Nakaragragsak a nangipadamag ken ni nanangko a rimmuar kanon ti umuna nga ababa a sarita a sinuratna. Dagus a pinidutko ti Bannawag nga indissona iti rabaw ti lamisaan. Nakitak ti naganna iti akkub ti magasin, iti babaen ti paulo ti saritana. Gapu iti ragsakko, diak napuotan a naibalikas a siakto ti mangtawid iti kinamannuratna. Inaprosanna ti ulok. Kinunana nga agbalinakto met a mannurat basta la ket agan-anus ken aggaggagetak nga agsursuro.
Iti agdama, addaak iti ballasiw taaw a kas OFW. Pagin-inanaak ken pagliwliwaak ti agsursurat iti kaaddak iti ganggannaet a pagilian. Agingga a nakasarakak iti maysa a grupo dagiti mannurat iti daniw nga Ilokano iti social media. Ditoy a pinadaskomet ti nagputar iti daniw. Adu ti pagkapuyak ngem inan-anusak ti nagadal agingga a nakaipablaakak metten iti dandaniw iti Bannawag. Iti met laeng social media a naam-ammok dagiti mannurat a mabasbasak laeng ti naganda iti Bannawag ken libro. Isuda ti nagbalin nga inspirasionko tapno itultuloyko ti agsurat. Dakkel ti ayatko a makasursuro pay ta nagsubli manen ti reggetko a kas idi adda pay daydi Tata Meliton a nagtalinaed nga id-idoluek agingga ita. --O
Ti autor: Naipasngay idi Hunio 22,1971 idiay Uddiawan, Solano, Nueva Vizcaya. Maikanem nga anak da Juanito Gaborno a taga-Cervantes, Ilocos Sur ken Rosita Baligad Gaborno a taga-Guimba, Nueva Ecija. Naparaburanda ken ni Orlando Tabieros Jr. (ti Gonzaga, Cagayan) a kaingungotna iti dua nga annak, da Wendy ken Mark Angelo nga agpada a nagturpos iti kurso nga Edukasion. Lima a tawen a naglaklako kadagiti produkto a pagpapintas sa napan nagtrabaho iti ballasiw-taaw tapno maisaganaanna ti panagbasa dagiti annakda. Kameng ti grupo dagiti mannurat ken cultural workers a Nakem Without Borders a binukel ni Dr. Aurelio S. Agcaoili.
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, 09171360110.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
