Impaulog ti bicameral conference committee ti Kongreso (Bicam) nga indauluan ni Senate President Juan Miguel Zubiri itay Disiembre 11 ti gakat a PhP5.768-trilion a General Appropriations Bill (GAB) para iti 2024.
Kinuna ni Senate Finance Committee chief Sen. Juan Edgardo “Sonny” Angara nga awan ti uray asino man a kameng ti Bicam ti nangilungalong a maisubli ti confidential fund ti Office of the Vice President (OVP) ken ti Department of Education (DepEd), nga idadauluan ni Bise-Presidente Sara Duterte, ta na-realign daytoy kadagiti ahensia a mangbambantay iti seguridad ti pagilian, kas iti ahensia ti intelihensia ken pannakabagi ti linteg.
Iti GAB 2024, kadakkelan ti pondo ti DepEd a naaddaan iti PhP717.663-bilion tapno maipatungpal dagiti programa kas iti Senior High School Voucher Program; Tulong Dunong Program ti Commission on Higher Education (CHED); ti Tulong Trabaho Fund; ti Training for Work Scholarship Program (TWSP); ken ti Special Training for Employment Program (STEP).
Nanayonan ti badiet ti Department of National Defense (DND) a nagbalin a PhP238.357-bilion, idinto a nagbalin a PhP29.4-bilion ti pondo ti Philippine Coast Guard (PCG).
TURISMO: Intayon Idiay Ayuyang Garden iti Pila, Siudad ti Laoag!
Nanayonan met ti pondo ti Department of Health (DOH) tapno maipatungpal ti Medical Assistance to Indigent and Financially-Incapacitated Patients (MAIFIP) ken ti Health Facilities Enhancement Program (HFEP).
Nanayonan pay ti badiet para iti Department of Transportation (DOTr) ken ti Department of Public Works and Highways (DPWH) tapno maipatakder dagiti impraestruktura kas iti kalsada, rangtay, tren, ken pagsangladan.
Agtultuloy latta ti pondo para iti Assistance to Individuals in Crisis Situations (AICS) ken 4Ps (Pantawid Pamilyang Pilipino Program) tapno mangipaay iti tulong kadagiti Filipino nga awanan iti panggedan.
Iti biang ti Kamara, kinuna ni Committee on Appropriations Chairman Ako Bicol Party-list Rep. Zaldy Co nga adda PhP10-bilion a nailatang para iti agrikultura a mangsuportar kadagiti mannalon kas iti padanum, libre a bukbukel, ganagan, ken dadduma pay a kasapulan iti panagtalon.
Nanayonan met ti pondo ti National Academy of Sports (NAS) ken ti Philippine Sports Commission (PSC).
Segun ken ni Co, adda PhP60-bilion a nailatang para kadagiti dadakkel a proyekto kas iti dam, pagurnongan ti danum (water reservoir), ken solar irrigation system. Malaksid iti daytoy, adda pay PhP25 a bilion a nailatang para iti Department of Agriculture (DA) tapno masuportaran dagiti dadduma pay a mulmula.
Innayon ni Co a nairaman iti badiet ti PhP60 bilion para iti programa nga Ayuda sa Kapos ang Kita Program (AKAP) a pagnumaran dagiti 12-milion a pamilia a nababbaba ngem PhP23,000 ti binulan a matgedanda.
Kalpasan a pinatalgedan ti Kongreso, mayawat daytoy ken ni Presidente Ferdinand Marcos Jr. tapno aprobaranna sakbay nga aginana ti Kongreso inton Disiembre 15. (Hannah Torregoza/Manila Bulletin//Lito Hilidon/Bannawag)
