Tapno maital-o ti kalidad ti panagisuro iti pamunganayan nga edukasion, ipaulog ti Department of Education (DepEd) iti mabiit ti pagannurotan a mangikkat iti administratibo a trabaho dagiti mannursuro kadagiti umay a lawas.
Segun ken ni Bureau of Human Resource and Organization Development (BHROD) Director ti DepEd Mario Bermudez itay Disiembre 11, masapul a maikkan ti suporta dagiti mannursuro tapno naan-anay ti panagisuroda ken saandan nga aramiden dagiti administratibo a trabaho.
Nabayagen a yar-areng-eng dagiti mannursuro ti kinaadu dagiti administratibo a trabahoda kas iti panagidulin iti rekord, panangipila, panangiwardas iti okasion, ken dadduma pay nga aktibidad iti eskuela.
Iti mairuar a pagannurotan, kiddawen ti DepEd a mangalada iti non-teaching personnel manipud iti local government units (LGU) a mangtaming kadagiti administratibo a trabaho.
TURISMO: Intayon Idiay Ayuyang Garden iti Pila, Siudad ti Laoag!
Segun ken ni Bermudez, gandat ti DepEd ti mangbukel iti 5,000 a non-teaching positions, a buklen ti Administrative Officer II ken Project Development Officer I.
Idi Hulio 2023, impakaammo ti DepEd a mangipaulog daytoy iti pagalagadan a mangikkat iti administratibo a trabaho dagiti mannursuro. (Dexter Barro II/Manila Bulletin//Lito Hilidon/Bannawag)
