Salaysay ni CARIDAD UMIPIG DELA CRUZ
DANDANIAK agturposen iti sekundaria idi “maam-ammok” ti Bannawag. Naawisak idi iti panagkasangay ti maysa a kaeskuelak ket iti balayda, kasla nasulekak a nakakita iti paboritok nga artista a nayakkub iti magasin a nakaparabaw iti lamiseta iti salas.
Inukradko ti magasin, magagaranak iti linaonna. Agessemak idi iti komiks isu a daytoy ti immuna a sinapulko iti magasin. Maay-ayatanak a nangbasbasa iti Ilokano a komiks. Insarunok a binasa dagiti sarita. Ngem kaarigko ‘tay ubing a naagawan iti kankanen ta kaim-imasan pay la ti panangbasak, agibunongda metten iti merienda. Diak ammo ta uray naimas ti templa ti paboritok a padarusdos ken dudol, diak napnek a nangan. Inyad-addak ngamin nga inrapin ti basbasaek a Bannawag. Nabsogak iti binasak a sarita ket panagriknak, naim-imas manen dagiti dadduma a linaon ti Bannawag. Kayatko koma a basaen amin a linaonna ngem agawidkami met idin. Isu nga inkeddengko a dumagasak laengen idiay ili iti bukodko a kopia. Lunes daydi ket kabuslon pay la ti alawansko. Diak ammo ta iti umuna pay laeng a pannakaam-ammok ken pannakabasak iti Bannawag, sapsapulek metten!
Sipud idin, saankon a maliwayan ti gumatang iti Bannawag. Nasakit ngaminen ti nakemko no adda maliwayak kadagiti sursurotek a nobela ken arigna “makaapiang” a sarita. Naynayen a mangilatangak iti igatangko manipud iti linawas nga alawansko. Idi damo, ilemlemmengko dagiti Bannawag-ko ta ti ammok ket ungtandak dagiti dadakkelko no maammuanda a sabali ti pangigasgastosak iti it-itedda a kuartak. Saanak idin a rinabii a rummuar a mapan makibuya ti telebision iti kaarruba. Yunak ti asaynmentko iti salas a yan ti naraniag a bombilia. Iti uneg ti siledko ti pagbasaak iti Bannawag. No umay ni nanangko ta naynay nga umaynak kitaen sakbay a maturog, pandagak iti punganko ti Bannawag saak agintuturog tapno dina madlaw a nakariingak pay laeng ken Bannawag ti basbasaek imbes a ti librok.
Ngem iti maysa a rabii, naduktalan ni nanangko ti palimedko. Nailibayak gayam kabayatan iti panagbasbasak iti Bannawag. Umayna koma iddepen ti silaw idi makitana ti nakaparabaw a magasin iti rupak. Ngem saannak met nga inungtan. Binulodna ketdi. Diak la impagarup a dati met gayam a managbasa iti Bannawag.
Iti unos ti kinabalasangko, ti Bannawag ti makunak a “puon ti ragsakko.” No sumangpetak idi manipud iti eskuela, pagtarusak a rebisaren dagiti kopiak no kompleto met laeng. No adda kurangna, sapulek ta ti kayatko, no adda man bimmulod, masapul nga isublida.
Mannurat ti Bannawag Clotilde C. Alzate, rinambakanna ti maika-100 a panagkasangayna
No awan maobrak, ulit-ulitek a basaen. Lalo dagiti sinurat ti kalugarak (Santa Maria, Ilocos Sur) a nobelista nga id-idoluek, ni Jovito F. Amorin.
Iti kababasak iti Bannawag, naguyugoyak a nagsurat ket nagipatulodak iti benneg nga “Ania ti makunam?” Anian a ragsakko idi adda napagasatan a naipablaak a sinuratko. Nagpaiduma gayam ti rikna ti maimaldit ti naganna iti popular a magasin--ad-adda la ket ngaruden a naparubroban ti panagayatko iti Bannawag. Inar-arapaapko payen a sapay ta makaipablaakakto met iti putarko a daniw.
Uray idi addaanakon iti bukod a pamilia ken nagtrabahoakon iti salinong ti gobierno, saan a naipusing ti Bannawag iti biagko. Naynay nga imbasbasak dagiti napipintas a sarita kadagiti annakko. Intukitko kadagiti naganus a pampanunotda dagiti napintas nga adal a maarnas kadagiti ibasbasak a sarita.
Maipagpannakkel a kunaen a gapu iti Bannawag, ammon dagiti annakko iti agbasa sakbay nga inserrekko ida iti eskuela.
Gapu kadagiti pempenko a Bannawag, adda sindadaan a pangkartibanda idi kadagiti kasapulanda iti homework-da. Napadakkel ken nakawesanmi ida iti adal a kinataktakunaynaymi ti Bannawag.
Ita, maysaakon a retirado, ken balo. Malagipko manen dagidi Bannawag-ko a pinablad ti layus a nangdidigra iti ilimi a Santa Maria. Bannawag laengen ti kaat-atagko. Ad-adu koma ita ti pagliwliwaak agingga a kabaelan ti matak a lasinen dagiti letra. Diak kabaelan nga isina ti panagayatko iti Bannawag ta isu ngarud ti puon ti ragsakko. Ket siakto ngatan ti kararagsakan a managbasa iti Bannawag no adda maipablaak a daniwko. Namnamaek addanto met laeng makalusot a templak iti panagraman ti editor kadagiti ipatulodko a sinurat. --O
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
