Maysa ti Filipinas kadagiti 153 a kameng ti United General Assembly (UNGA) nga agkidkiddaw iti pannakaisardeng ti gubat iti Gaza, idinto a maikaduan daytoy a bulan a pananggubat ti Israel iti Hamas kalpasan ti panangraut ti Hamas iti Israel idi Oktubre 7.
Gapu iti nakaam-amak a kasasaad iti Gaza, sinangal ti UNGA itay Disiembre 12 ti resolusion a mangkidkiddaw a maisardeng koma ti panaggubat ken mawayawayaan dagiti tinengngel ti Hamas iti Gaza.
Sangapulo a pagilian, a pakairamanan ti Israel ken Estados Unidos, ti simmupiat iti resolusion, idinto a saan a nagbotos dagiti 23. Adda 193 a pagilian a kameng ti United Nations (UN).
Kinuna ni Philippine Permanent Representative to the UN Antonio Lagdameo a konkondenaren latta ti Filipinas ti panangraut dagiti terorista a Hamas idi Oktubre 7 iti Israel, ngem impaganetgetna a kasapulan ti panagtulnog iti International Humanitarian Law tapno maisardengen ti pannakakettel dagiti biag ken panagsagaba, agraman pannakasalaknib dagiti sibilian, kangrunaanna dagiti babbai ken ubbing.
Mannurat ti Bannawag Clotilde C. Alzate, rinambakanna ti maika-100 a panagkasangayna
Kinuna pay ni Lagdameo a suportaran ti Filipinas ti pannakarisut a mangraem iti kalintegan ken dagiti kasapulan dagiti sibilian a Palestinian ken Israeli.
Segun iti UN, nupay saan a legal a maipatungpal ti nasangal a resolusion ti General Assembly, addaan daytoy iti moral a pagrebbengan a mangibagbagi iti pagtaktakderan dagiti kameng ti UN maipapan iti maysa a banag.
Kinuna ni UNGA President Dennis Francis nga adda latta pagannurotan uray iti gubat ken saan koma a salungasingen dagiti mannakigubat dagiti kangrunaan a prinsipio ken pagalagadan, idinto nga addan panangraut kadagiti sibilian ken di panagraem iti sangalubongan a linteg ken iti international humanitarian law. (Joyce Ann L. Rocamora/PNA//Lito Hilidon/Bannawag)
