Bimmassit ti bilang dagiti bagyo nga immay iti Filipinas iti napalabas a 25 a tawen, ket ita, mabalin a sagrapen ti pagilian ti kakaruan a tikag iti las-ud ti dua a dekada, kinuna ni chief climatologist ti PAGASA (Philippine Atmospheric, Geophysical and Astronomical Services Administration) Ana Solis itay Disiembre 13.
Ti Filipinas a maysa a tropikal a nasion -- a maibilang kadagiti pagilian a nalaklaka a maapektaran ti panagbalbaliw ti klima -- 20 a bagyo ti kadawyan nga umay iti las-ud ti maysa a tawen.
Segun ken ni Solis, 10 a bagyo laeng ti immay wenno immasideg iti pagilian ita a tawen, ket mabalin a marimbawanen ti rekord a 11 a bagyo idi 1998, idinto a tallo a lawas laengen ti natda iti 2023. Innayon ni Solis a mabalin a ti panagbalbaliw ti klima (climate change) ti makaigapu iti daytoy.
Segun ken ni Department of Science and Technology (DOST) Secretary Renato Solidum, mabalin a marikna ti "kalalainganna agingga iti nakaro unay a panagtikag" manipud iti Pebrero agingga iti Mayo, 2024 gapu iti El Niño a maidasig iti tikag idi 1997 agingga 1998 a maibilang a kakaruan pay laeng a tikag iti pagilian.
Manipud Kadagiti Agdama a Kameng ti Bannawag: Dios ti Agngina!
Kinuna ni Solidum a 77 a porsiento dagiti probinsia ti pagilian (adda 81 a probinsia ti Filipinas) ti manamnama nga agsagrap iti tikag iti arinunos ti Mayo.
Iti Manila, mabalin nga agingga 38.3-degrees Celsius ti kabarana iti Abril ken Mayo -- kapadana ti kapudot idi 1998.
Iti amianan a Luzon, mabalin a 41-degrees Celsius ti kapudotna.
Indagadag ni Solidum kadagiti ahensia ti gobierno nga agsaganada tapno masierto nga adda umdas a suplay ti danum, taraon, ken koriente. (Agence France-Presse//Lito Hilidon/Bannawag)
