Binallaagan ni National Economic and Development Authority (NEDA) Secretary Arsenio M. Balisacan ti publiko mainaig iti mabalin nga epekto ti nakaro nga El Niño kadagiti presio dagiti magatang, a mangiparparipirip a narikut dagiti mapasungad a bulbulan.
Kinuna ni Balisacan nga apektaran ti umay nga El Niño ti presio dagiti kangrunaan a kasapulan ti tao, a mangapektar iti idudur-as ti ekonomia inton umay a tawen.
Segun ken ni Department of Science and Technology (DOST) Secretary Renato Solidum Jr., arigna maipada ti nakaro a tikag idi 1997 agingga 1998 ti umay nga El Niño, a pakaigapuan ti nasaknap a pannakadadael ti agrikultura, ken maapektaran ti 65 a probinsia iti umuna a kagudua ti 2024.
Gapu itoy a pakdaar, agtataripnong dagiti kameng ti NEDA Board nga idauluan ti Presidente, tapno maisaganaan dagitoy "narikut a bulan."
Manipud Kadagiti Agdama a Kameng ti Bannawag: Dios ti Agngina!
Tapno agbalin a natalged ti presio dagiti kangrunaan a tagilako ken masierto ti kaadda ti suplay, naammuan a mabalin a mangipaulog ti gobierno kadagiti dadduma pay a wagas a kas iti panagangkat kadagitoy a kasapulan. (Xander Dave Ceballos/Manila Bulletin//Lito Hilidon/Bannawag)
