5 a daniw-Bannawag

Ni HONOR BLANCO CABIE

1
salaysay dagiti kailiak ta
sagidenna daytoy paragpagko.
pakaigapuan katawa nga ingga
awan, umisem met 'toy mugingko.

no 'tay kano adda ipumponda
manipud 'diay sacritan* daya ti
nagili a pinili 'ti dana
bumangon dungdung-awan ti puli.

'diay kamposantot' badoc adayo,
'diay minatay a bagbagkaten da
kalugaran matektekan, pudno:
'ta adayo kad' pay?' saludsodna.

magustuak man panagdildilada
kalugarak nga adda paragpagna.

* nasurok a 20 a kilometro a pagpagnaen sakbay a nagili ti pinili idi enero 1, 1920; ti nagili a pinili kadagidi a panawen sakup ti paoay, badoc ken batac.

2
ania ngarud, al-allingagek ti
aglawlaw no adda 'tay pittagaw
a mangharana met 'ti rabii
'toy lareg-lareg* ngem awan man riaw.

wenno nayepyepda ngatan, kunak,
ta no 'diay ilik a pinili ta
kastoy nga oras ti sardam ta siak
mailillili kaduak 'toy karkarma.

ngem no ta mairidepak ta kayat
daytoy riknak nga agampayagto
'diay pittagaw agbitbitbit ragsak,
'tay musika yetnagnat' lubongko.

ita, kailiwko 'diay ilimi
'yan pittagaw nga adu no rabii.

* nakaangayan ti nailian a kombension ti gumil filipinas idi abril 1996.

Kasla kimatkayo…
--paliiw ti maysa a gayyem iti in-inauna a gayyemna.

paliiwda't kinakaubingak,
ni 'tanudko a serafin, kas 'tay
kimat kano isu no 'tay pumsuak
'diay balikasna nga umipus pay.

ta uray siak, daytoy paliiwko,
napardas ti panagibultakna
kadagiti mapidutna a bato --
ania ngata daydiay pamay-anna?

wenno adu ngata daydiay adda
a batbato, salaknibna no 'tay
adda't makaariweng a dana
imbes nga isun daytay agtartaray?

dumuyaw nga adut' manglawlawlaw
ken serafin, ay! di makatugaw.

anian laing nga agarado ni
atanudko, no 'tay tangbaw innan
a talmegan agriaw kakellengan,
agallangugangen panagdir-i.
iwalinna 'tay bakbaka ken 'tay
kabkabrong pasaratsat naikapet
iti tangbaw, ay! addaan pasnek,
agungap a daga malinglingay.

'diay nuang agsardeng ken tumaliaw pay,
lapayagna isu 'tay agsipat
ta 'diay daga nga ung-ungapenna
daniwanna pannakamurmuray.

mata ni 'tanudko, ay! agrimat,
agpannapanna met 'diay karkarma.

adu 'tay gameng a mapidutko
nga ibulsitok met no 'tay innak
agmaymaysa 'ti imeng lubongko,
sadiay kaabayko 'toy karkarmak.

no kasano a pagdaniwenna
daydiay aradona no 'tay innan
a pagungapen dagus 'diay daga
a din a maitudot' ragragsaknan.

ammok innak italmeg met no 'tay
kayatkot' daniw, kas soneto met
koma, 'tay daniw a manglinglingay
mangted awan sarday a rupanget.

adda met nasursurok, 'tanudko,
no 'tay dakdakamin 'diay lubongko.

Magatang ti Bannawag kadagiti sukiyo nga aglaklako iti pagiwarnak ken magasin.

Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.

Mabalin pay a magatang ti Bannawag iti

Shopee: http://bit.ly/Bannawag-Shopee

Lazada: http://bit.ly/Bannawag-Lazada

Para iti digital a kopia:

PressReader: http://bit.ly/3n83kNQ

Magzter: http://bit.ly/407pazG

Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph

Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,

iti Instagram: https://www.instagram.com/bannawagmagazine

iti Twitter: https://twitter.com/BannawagMagasin

Facebook Page: https://www.facebook.com/BannawagMagasin

Facebook Public Group: https://www.facebook.com/groups/bannawag.magazine