Nagpirma dagiti uppat a pamilia iti Basilan iti tulag ti panagkappia itay Disiembre 16 nga inwardas ti 101st Infantry Brigade (Three Red Arrows) a nangleppas iti "rido" wenno clan war.
Pinirmaan dagiti pamilia da Amil Palluh ken Jhomie Majaranboth ti Barangay Bohe Suyak, iti ili ti Ungkaya Pukan ti tulag iti opisina ti 64th Infantry (Knights) Battalion iti Barangay Tumahubong iti Sumisip.
Iti Al-Barka, nagkappia met dagiti agbibinnusor a puli da Sattar Sappaludin (a.k.a. "Ombol") ken Adzhar Usman (a.k.a. "Jungga") a pinatalgedan ti panagsapatada iti Qur'an iti 101st Infantry Brigade iti Barangay Tabiawan, Siudad ti Isabela.
Naggapu iti Barangay Kuhon Lennuh, Kuhon, ken Magkawa dagiti puli ni Sappaludin; idinto nga agnanaed iti Barangay Sangkahan ti puli ni Usman.
TURISMO: Intayon Idiay Ayuyang Garden iti Pila, Siudad ti Laoag!
Dagitoy a "rido" wenno riri ti puli ti nangkettel iti adu a biag iti agsinnumbangir a puli, agraman babbai ken ubbing, ken nanglapped iti panagdur-as ti ekonomia, edukasion, ken pannakaipaay ti kangrunaan a serbisio ti gobierno iti lugar.
Dinayaw ni Brig. Gen. Alvin V. Luzon, a Commander ti 101st Infantry Brigade, dagiti maseknan a partido a nangarakup iti talna ken panagkakappia.
Nagyaman met ni Luzon iti 18th IB, 64th IB, gobierno lokal ti Ungkaya Pukan, Al-Barka, ken Akbar, ti Moro Islamic Liberation Front (MILF), ti Philippine National Police (PNP), ti sektor ti relihion, Joint Peace Security Team (JPST), ken dadduma pay a maseknan a partido a nangibabaet ken namagkappia kadagiti pamilia babaen ti pannakisarita ken diplomasia. (Bonita Ermac/Manila Bulletin//Lito Hilidon/Bannawag)
