Manamnama a pirmaan ni Presidente Ferdinand Marcos Jr. ti 2024 General Appropriations Act (GAA) inton Disiembre 20, segun ken ni House Speaker Martin Romualdez.
Kinuna ni Romualdez itay Disiembre 17, napirmaan koman ti Presidente daytoy sakbay a napan iti Tokyo no nayawat a dagus ti Kongreso iti Makalanyang ti kopya ti nailian a badiet nga agdagup iti PhP5.768-trilion.
Ngem kuna ni Romualdez a nakasaganan ti pirmaan ti Presidente inton Mierkoles, Disiembre 20, ken saanda a mangnamnama nga adda ibeto ti Presidente.
Innayon pay ni Romualdez nga inanamongan ti agpada a kameng ti Kongreso ti pannakaikkat iti confidential fund dagiti sibilian nga ahensia, idinto nga imbabawin dagiti daulo ti ahensia ti kiddawda a confidential fund.
TURISMO: Intayon Idiay Ayuyang Garden iti Pila, Siudad ti Laoag!
Kinuna pay ni Romualdez nga ipangpangruna ti Presidente ti seguridad ken dagiti pakaseknan iti panangdepensa ti Filipinas, kangrunaan iti West Philippine Sea, isu a nakissayan dagiti mailatang a confidential fund kadagiti sibilian nga ahensia.
Sakbay a pimmanaw iti Manila itay Disiembre 15, kinuna ni Presidente Marcos a pirmaannan ti nailian a badiet kadagiti sumaganad nga aldaw no malpasen ti bicameral committee ti pinal a bersion ti nailian a badiet para iti 2024. (Betheena Unite/Manila Bulletin//Lito Hilidon/Bannawag)
