Masida ti bulong ti katuday, saan la a ti sabongna-Bannawag

Salaysay ni MARIO ADELMO CABREROS

NAPADASANYON ti nagluto ken nagsida kadagiti saan nga am-ammo wenno nakairuaman a natnateng wenno mula?

Nalabit manmano ti makaammo a saan laeng a ti sabong ti katuday ti masida, ngem mabalin pay ti uggot wenno naganus a bulongna. Rurosen laeng a kas marunggay dagiti bulongna sa ilaok iti dinengdeng.

Mabalin met nga ilaok ti rangaw wenno uggot ti ubi iti napablad a balatong ken dadduma pay a bukbukel.

Pinadasmi pay ti naganus a bunga ti kakawate (madre cacao). Naimas met a madengdeng. Gagangay a ti laeng sabongna ti am-ammo a masida (makilnat, wenno mailaok iti bukbukel). Uray ti uggot, sabong, ken naganus a bunga ti ipil-ipil, masida met laeng.

Napadasanmi payen a saan nga ukisan ti naganus a bunga ti sayote ken papaya. Saanmi pay nga nga ik-ikkaten ti bukel ti sayote ta naimas met laeng. Ngem ti bukel ti papaya, saan nga iraman nga iluto ta napait daytoy.

Mabalin pay a saanen nga ikkaten ti ungkay wenno pamurosan ti tarong, masida met laeng, kuskosen wenno dalusan laeng lalo no adda kasla siitsiitna.

No magustuanyo ti napait wenno kasla pinapaitan a digo, pangpaimas iti digo ti lauya (tinola) wenno sapsapuriket a manok ti mailaok a nataltal a lanut (nagimurian) ti paria.

Napaneknekanmi metten a masida, ken naimas, ‘tay naganus a cactus (malomalo).

Nakairuamanen nga ibellengtayo ti bukel ti kalangakang a salamagi ta natangken daytoy. Pinadasmi a pinagtubo ket ninatengmi ti rusingna nga inlaok iti sinigang. Naimas ti alsemna a kas met la iti uggot wenno barusbos ti salamagi.

Iti social media, adu ti maipaspaskil a video ken ladawan dagiti mula a mabalin a taraon (edible). Kas iti uggot ti tebbeg, naimas a magettaan. Kasta met ti uggot ti mulberry, naimas a makilnat wenno maensalada. Pati ti Vietnam rose.

Adu pay a mulmula ti mabalin a masida wenno makan. No kayatyo met a padasen, aramiden laeng ti makunkuna a “taste test” wenno suboken nga umuna no ania ti ramanna.

Mangala iti bassit a parte ti mula a kayat a ramanan. Ngalngalen ngem saan a tilmonen wenno alimonen a dagus. No madi ti ramanna, iruar a dagus. No met mayat ti ramanna, pagtalinaeden iti uneg ti ngiwat iti sumagmamano a segundo ket sintiren/obserbaren no adda epektona kas iti panaggagatel wenno allergy. No awan marikna a sabali, mabalin a tilmonen. Obserbaren ti bagi no adda sabsabali a marikna kas iti allergy wenno pannakaulaw.

Ngem no saan a talaga a kabesado wenno kapkapnekan a natalged nga ipauneg ti maysa a mula a nadamag wenno maibagbaga nga edible, saan a gamden a padasen. Masapul a penken nga umuna a safe ken edible a talaga. Agdamag kadagiti nakapadasen wenno kadagiti nabayagen nga agsidsida kadagitoy.

Ipalagipmi met a dagitoy a bukodmi a padas, survival tips wenno tapno adda pamedped no maisar-ong iti putputong a lugar kas koma iti bakir wenno bantay wenno no adda didigra ket adda dagitoy a mulmula. Awan ketdi ti epektona kadakami dagiti pinadasmi nga impauneg a mulmula. Ngem manen, agduduma met ti makunkuna a “toxicity/allergy tolerance” ti tunggal maysa. --O

Magatang ti Bannawag kadagiti sukiyo nga aglaklako iti pagiwarnak ken magasin.

Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, 09171360110.

Mabalin pay a magatang ti Bannawag iti

Shopee: http://bit.ly/Bannawag-Shopee

Lazada: http://bit.ly/Bannawag-Lazada

Para iti digital a kopia:

PressReader: http://bit.ly/3n83kNQ

Magzter: http://bit.ly/407pazG

Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph

Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,

iti Instagram: https://www.instagram.com/bannawagmagazine

iti Twitter: https://twitter.com/BannawagMagasin

Facebook Page: https://www.facebook.com/BannawagMagasin

Facebook Public Group: https://www.facebook.com/groups/bannawag.magazine